Þessi viðureign gæti orðið leikur kattarinns að músinni en ef Snæfell spilar eins og pappírinn segir ættu þeir alveg að geta stolið svo mikið sem einum leik. Snæfell hefur lent í meiðslum og vandamálum á tímabilinu sem hafa eflaust sett töluverðan svip á árangur liðsins í vetur. Mótherji Snæfellinga er hins vegar 21-1 deildarmeistari sem spilar eins og vel smurð vél sem framleiðir sigurleiki á færibandi, svo það verður við ramman reip að draga hjá Snæfellingum í næstu leikjum.
Pavel Ermolinskij hatar ekki að spila á móti Snæfelli og hann skilaði þrefaldri tvennu í báðum leikjum liðanna í vetur sem KR-ingar unnu. Sóknarleikur KR-inga er nánast lýtalaus. Skilvirkni skín úr hverju horni og lið sem skorar 112 stig í 100 sóknum, hittir 38% fyrir utan þriggja stiga línuna en þarf aðeins að sækja 15% af stigum sínum af línunni, er ekkert að grínast. Sem vitnisburð um skotnýtingu KR í vetur þá tóku þeir 1555 skot utan að velli (næstfæst allra liða) og hittu úr 764 (flest allra liða) sem gefur nýtingu upp á 49,1%. KR er með um 59% nýtingu í teignum og ekkert svæði á vellinum þar sem þeir hitta undir 36%. Varnarleikur Snæfells verður að hoppa upp á næsta level til að eiga roð í deildarmeistarana – eða vonast til að þeir mæti til leiks með hálfum hug eins og þegar þeir mættu Grindvíkingum strax eftir jól.
