Körfuknattleikssamband Íslands hélt í dag blaðamannafund fyrir úrslitakeppnina í Domino´s-deild kvenna en hún hefst þann 2. apríl næstkomandi á viðureign Hauka og Skallagríms. Glíma Keflavíkur og Vals hefst svo 3. apríl. Vinna þarf þrjá leiki í undanúrslitum og úrslitum til þess að verða Íslandsmeistari.
Haukar-Skallagrímur
Haukar unnu þrjá og Skallagrímur einn af deildarleikjum liðanna í vetur. Haukar hafa þrívegis orðið Íslandsmeistarar eftir úrslitakeppni en það voru árin 2006, 2007 og 2009 en Borgnesingar hafa ekki unnið þann stóra, hver veit nema breyting verði þar á eftir þetta tímabil? Ari Gunnarsson stýrir Skallagrím og heldur nú inn í sína þriðju úrslitakeppni kvenna á ferlinum en kollegi hans hjá Haukum, Ingvar Guðjónsson, er aðalþjálfari í sinni annarri úrslitakeppni á ferlinum.
Leikdagar í einvíginu:
2. apríl Haukar – Skallagrímur
6. apríl Skallagrímur – Haukar
10. apríl Haukar – Skallagrímur
13. apríl Skallagrímur – Haukar *ef þarf
15. apríl Haukar – Skallagrímur *ef þarf
Keflavík-Valur
Félögin skiptu systurlega deildarleikjunum á milli sín, unnu bæði tvo leiki. Engum blöðum er um það að fletta að Keflavík er sigursælasta kvennalið landsins með 12 Íslandsmeistaratitla undir beltinu eftir úrslitakeppni og eru ríkjandi meistarar. Valskonur hafa hinsvegar ekki orðið Íslandsmeistarar eftir úrslitakeppni og freista þess að breyting verði þar á. Þær munu sakna Kristrúnar Sigurjónsdóttur sem lék ekki síðustu níu leikina með Val og verður fjarverandi amk út þessa leiktíð. Sverrir Þór Sverrisson þjálfari Keflavíkur heldur nú inn í sína sjöundu úrslitakeppni í efstu deild kvenna en mótþjálfari hans Darri Freyr Atlason þreytir frumraun sína á þessu sviði. Reynslan vs. „rookie-inn.“
Leikdagar í einvíginu
3. apríl Keflavík – Valur
7. apríl Valur – Keflavík
10. apríl Keflavík – Valur
13. apríl Valur – Keflavík *ef þarf
15. apríl Keflavík – Valur *ef þarf
Mynd/ Frá fundi KKÍ í dag þar sem fulltrúar liðanna fjögurra „mátuðu“ bikarinn eftirsótta.
