Helgi Már Magnússon og Uppsala Basket unnu frækinn og nauman 80-81 sigur á 08 Stockholm HR í sænsku úrvalsdeildinni í kvöld. Benjamin Smith reyndist hetja Uppsala í leiknum með flautuþrist um leið og flautan gall! Uppsala átti síðustu sókn leiksins þegar 6 sekúndur voru til leiksloka og Smith brást ekki bogalistin á ögurstundu.
Helgi Már var í byrjunarliðinu og lék í tæpar 36 mínútur og skoraði 8 stig. Helgi var einnig með 8 fráköst og 2 stoðsendingar og eftir sigur kvöldsins er Uppsala í 5. sæti deildarinnar með 18 stig og hafa nú jafnað Jakob Örn og Hlyn í Sundsvall að stigum.
