22:49
{mosimage}
Nú fyrr í dag mættust Snæfell og Keflavík, í einum af toppleikjum
11. umferðar, í Stykkishólmi. Keflvíkingar telfdu fram nýjum bandarískum
leikmanni Isma´il Muhammad, sem kom í stað Tim Ellis. Leikurinn var sýndur í beinni útsendingu á RÚV.
Það var ljóst alveg frá byrjun að Snæfellingar ætluðu sér sigur í þessum
leik. Þeir skoruðu 6 fyrstu stig leiksins og börðust af miklum krafti um
alla lausa bolta. Það var sem Keflvíkingar væru enn í jólafríi og máttu sín
lítils gegn baráttuglöðum heimamönnum. Það var svo Þröstur L. Jóhannson sem
kom Keflvíkingum á blað með góðri körfu. Þöstur var þarna í fyrsta skipti í
byrjunarliði Keflavíkur. Nokkuð jafnræði var svo með liðunum framan af
leikhlutanum en Snæfell seig þó smátt og smátt fram úr. Að loknum fyrsta
leikhluta höfðu Snæfellingar 9 stiga forskot, 29-20.
{mosimage}
Í öðrum leikhluta héldu Snæfellingar áfram að berjast af mikilli hörku og
áttu Keflvíkingar fá svör gegn framvarðarsveit heimamanna. Greinilegt var að
þeir söknuðu Danans stóra, Thomas Soltau, sem lék ekki með vegna meiðsla í
hásin. Snæfell fór mikinn í fráköstum og tóku 17 slík í öðrum leikhluta á
móti aðeins 5 hjá Keflavík. Keflavík náði þó að minnka muninn niður í 5 stig
í öðru leikhluta, 39-34, en í hálfleik var staðan 47-37 fyrir heimamenn.
{mosimage}
Í fyrri hálfleik var Gunnar Einarsson allt í öllu hjá Keflvíkingum og
skoraði 15 stig en hjá Snæfell voru Hlynur Bæringsson og Sigurður
Þorvaldsson með 12 stig hvor. Einnig kom Jón Ólafur Jónsson sterkur inn af
bekknum fyrir Snæfell.
Þriðji leikhluti var margt um líkt fyrstu tveimur, Snæfell hélt þægilegri
forystu og hélt áfram yfirburðum í fráköstunum. Magnús Gunnarsson vaknaði
til lífsins fyrir Keflavík og skoraði 7 stig af þeim 13 sem Keflavík skoraði
í leikhlutanum. Staðan að loknum þriðja leikhluta var 66-50 heimamönnum í
vil.
{mosimage}
Í fjórða leikhluta náðu Keflavík að gera nokkuð gott áhlaup að forystu
heimamanna og minnkuðu muninn niður í 10 stig en nær komust þeir ekki.
Mótlætið virtist fara illa í gestina og brutu þeir mikið á heimamönnum.
Snæfell komst fljótt í bónus og fengu alls 13 víti í leikhlutanum en skoruðu
aðeins úr 7 þeirra. Keflavík vann síðasta leikhlutann 17-14 og þar af
skoruðu þeir 5 þriggja stiga körfur. Þegar tæpar 2 mínútur voru eftir af
leiknum fékk Isma´il Muhammad dæmda á sig óíþróttamannslega villu fyrir að
slá til Hlyns Bærings. Lokatölur voru 80-67 fyrir Snæfell.
{mosimage}
Atkvæðamestir hjá Snæfell voru Justin Shouse með 22 stig og 6 stoðsendingar,
Sigurður Þorvaldsson með 20 stig, Jón Ólafur Jónsson með 16 stig og 9
fráköst og Hlynur Bæringsson með 15 stig, 15 fráköst og 7 stoðsendingar.
Hjá Keflavík var Magnús Gunnarsson með 19 stig, þar af 5 þriggja stiga
körfur og Gunnar Einarsson með 18 stig og 4 stolna bolta. Lítið sást til
Isma´il Muhammad, en hann skoraði aðeins 5 stig og tók 6 fráköst.
texti og myndir: Andrés Már Hreiðarsson
