Tæplega 1000 manns fylgdust með þegar Skallagrímur tryggði sér sæti í úrvalsdeild á nýjan leik með öruggum sigri á ÍA í oddaviðureign liðanan í 1. deild karla. Fjósið var í fantagír, áhorfendur beggja liða fóru á kostum og það var uppselt löngu fyrir leik, færri komust að en vildu! Skagamenn kveðja þetta tímabil sem spútniklið deildarinnar en Borgnesingar fara upp í úrvalsdeild ásamt sigurvegurum deildarinnar, KFÍ.
Skallagrímur lék síðast í úrvalsdeild tímabilið 2008-2009 og munu nú á næstu leiktíð leika í deild þeirra bestu, sé tekið mið af fjörinu í Fjósinu í kvöld verður um erfiðan útivöll að ræða fyrir 11 önnur úrvalsdeildarlið.
Danny Sumner var með læti á upphafsmínútunum, varið skot og myndarleg troðsla og stúkan tók kipp sem kom fram á skjálftamælum. Skagamenn byrjuðu þó betur en í stöðunni 5-10 fyrir gestina bitu heimamenn frá sér og leiddu 21-12 eftir fyrsta leikhluta.
Síðustu sex mínúturnar í fyrsta leikhluta skoraði ÍA aðeins tvö stig en þeir jöfnuðu sig á þurrðinni snemma í öðrum leihluta en Borgnesingar höfðu frumkvæðið. Sama hvað heimamenn reyndu tókst þeim ekki að stinga af, Áskell Jónsson setti langþráðan þrist fyrir ÍA og minnkaði muninn í 41-35 en staðan var 43-39 í háflleik. Gestirnir komust inn í sendingu á lokasekúndunum og skoruðu flautukörfu sem þó var dæmd af.
Darrell Flake var með 15 stig í hálfleik hjá Skallagrím og Sumner 13 en hjá ÍA var Áskell beittastur í sóknarleiknum með 12 stig og Lorenzo McClellan 10 en skotnýting kappans var ekki góð og þá hafði Terrance fremur hægt um sig.
Með sæti í úrvalsdeild í húfi mættu Borgnesingar með læti í síðari hálfleikinn, Lloyd Harrison og Sumner fóru mikinn, þá sérlega Harrison og reyndist hann Skagamönnum erfiður í vörninni, stelandi boltum hér og hvar og keyrandi vel í bakið á gestunum. Áhlaupið varð í fyrstu 9-2 fyrir Skallana og staðan 66-54 fyrir lokasprettinn.
Skallagrímur gerði út um leikinn á upphafsmínútum fjórða leikhluta, þegar fimm mínútur lifðu leiks var staðan 80-58 þar sem lokatölur reyndust svo 89-67 og gríðarleg fagnaðarlæti brutust út í Fjósinu þegar sigurinn var í höfn.
Grannaglíma sem fer í oddaleik, það veit bara á gott. Einvígi Skallagríms og ÍA var 1. deildinni til sóma, Skagamenn geta borið höfuð hátt sem nýliðar í 1. deild og klárlega spútniklið tímabilsins. Borgnesingar voru líklegir frá byrjun tímabils og undirstrikuðu gæði sín í kvöld og hlutu í verðlaun sæti í úrvalsdeild.
Til hamingju Borgnesingar!
Byrjunarliðin:
Skallagrímur: Lloyd Harrison, Sigmar Egilsson, Egill Egilsson, Danny Sumner, Darrell Flake.
ÍA: Lorenzo McClelland, Áskell Jónsson, Hörður Nikulásson, Dagur Þórisson, Terrence Watson.
Heildarskor:
Skallagrímur: Danny Rashad Sumner 26/10 fráköst/4 varin skot, Lloyd Harrison 23/11 fráköst/5 stoðsendingar/6 stolnir, Darrell Flake 19/10 fráköst/7 stoðsendingar, Sigmar Egilsson 11/5 fráköst/7 stoðsendingar, Hörður Helgi Hreiðarsson 7/4 fráköst, Davíð Guðmundsson 3, Davíð Ásgeirsson 0, Hilmar Guðjónsson 0, Óðinn Guðmundsson 0, Egill Egilsson 0/5 fráköst/5 stoðsendingar, Elvar Þór Sigurjónsson 0, Elfar Már Ólafsson 0.
ÍA: Áskell Jónsson 20/7 fráköst, Lorenzo Lee McClelland 18/5 fráköst/6 stoðsendingar, Terrence Watson 10/13 fráköst/6 stoðsendingar/4 varin skot, Dagur Þórisson 9/4 fráköst, Hörður Kristján Nikulásson 4, Sigurður Rúnar Sigurðsson 3, Birkir Guðjónsson 3, Böðvar Sigurvin Björnsson 0, Oddur Helgi Óskarsson 0, Ómar Örn Helgason 0, Örn Arnarson 0, Trausti Freyr Jónsson 0.