,,Þetta hefur ekki verið að detta okkar megin. Við höfum spilað hörku leiki við alla andstæðinga okkar hingað til en höfum ekki náð að klára dæmið. Sem dæmi í gær áttum við síðustu sóknina í stöðunni 70-70 en boltinn rann úr höndum eins besta manns á mótinu þar sem boltinn var blautur og Bretar skora svo sigurkörfuna þegar þrjár sekúndur eru eftir,“ sagði Benedikt Guðmundsson þjálfari U20 ára landsliðs Íslands sem nú er statt í Bosníu á EM U20 í B-deild.
,,Auðvitað hefur þetta verið mikið svekkelsi að tapa leikjunum svona en við ætlum að halda haus og trúum að þetta fari að detta með okkur. Þessir strákar voru í 13. sæti fyrir tveimur árum í U18 og með sigri á morgun, gegn Hollendingum, spilum við um 13. sætið. Hið jákvæða við leikina er að þeir leikmenn sem hafa spilað best hafa vakið athygli á mótinu og fengið mikið hrós fyrir spilamennskuna,“ sagði Benedikt en eins og fram kemur þá verður Ísland að vinna Holland á morgun til að fá réttinn til að leika um 13. sætið á mótinu.
Mynd/ Tomasz Koldoziejski: Benedikt Guðmundsson þjálfari U20 ára landsliðs Íslands.