Bandaríkin eru tvöfaldir Ólympíumeistarar í körfuknattleik en karlalið þeirra vann í dag Spánverja í úrslitaleik um gullið. Í gær bar kvennaliðið sigurorð af Frökkum svo ánægjan er tvöföld fyrir þau bandarísku.
Lokatölur í gær í kvennaleiknum voru 86-50 Bandaríkjunum í vil þar sem Candace Parker var atkvæðamest í liði Bandaríkjanna með 21 stig. Í dag þegar Bandaríkin og Spánn mættust í karlaleiknum börðust Spánverjar hetjulega en Bandaríkjamenn voru sterkari á lokasprettinum og kláruðu leikinn 107-100. Kevin Durant skoraði 30 stig í liði Bandaríkjanna og LeBron James bætti við 19 en Pau Gasol var með 24 stig í liði Spánverja.
Þessi sjö stig sem skildu liðin að í dag er minnsti munur í úrslitaleik Ólympíuleikanna í 40 ár eða þegar Sovíetríkin unnu Bandaríkin 51-50.
Mynd/Sigurlið Bandaríkjanna fagnar í London.
