Spænska liðið Bilbao Basket er komið áfram í undanúrslit FIBA Eurocup-bikarsins eftir öruggan sigur á tyrkneska liðinu Petkim Spor í kvöld. Baskarnir höfðu töluverða yfirburði á heimavelli sínum og tryggðu sér tuttugu og fimm stiga sigur í seinni viðureign liðanna þar sem lokatölur urðu 85-60. Þar sem Bilbao hafði þegar unnið átta stiga sigur í fyrri leiknum í Tyrklandi lauk einvíginu með miklum mun eða 162-129 samanlagt. Bilbao á titil að verja í keppninni eftir að hafa staðið uppi sem sigurvegari á síðasta ári og er ljóst að Evrópudraumur liðsins lifir góðu lífi eftir frammistöðu kvöldsins.
Landsliðsmiðherjinn Tryggvi Snær Hlinason nýtti sínar mínútur á vellinum einstaklega vel en hann skoraði tíu stig á tólf mínútum og nýtti öll fimm skotin sín í leiknum auk þess að taka þrjú fráköst. Framlag hans hjálpaði liðinu að halda stjórn á leiknum og sigla örugglega inn í næstu umferð þar sem verkefnið verður krefjandi. Í undanúrslitunum mun Bilbao mæta annaðhvort ungverska liðinu Falco Szombathely eða Bosna BH Telecom frá Bosníu en ljóst er að spænska liðið stefnir ótrautt á að verja titilinn sem það vann í fyrra.
