Toronto vann á heimavelli Oklahoma

Þrír leikir fóru fram í NBA deildinni í nótt. Toronto Raptors tóku sig til og lögðu Oklahoma City Thunder 98-104 og það á heimavelli Oklahoma. Indiana tók Boston í bakaríið og Clippers mörðu Minnesota í Staples Center eftir framlengdan leik.

 

Kyle Lowry var í stuði fyrir Raptors gegn Oklahoma með 22 stig, 7 fráköst og 9 stoðsendingar en 27 stig, 9 fráköst og 5 stoðsendingar frá Russell Westbrook í liði heimamanna dugðu ekki til að þessu sinni. Fimm liðsmenn Raptors voru með 13 stig eða meira. Þetta var fjórði sigurleikur Raptors í röð á útivelli og með sigrinum bundu þeir enda á níu leikja sigurgöngu Oklahoma.