Tindastóll með sigur á Akureyri

Tindastóll fór með níu stiga sigur af hólmi í miklum baráttuleik í gærkvöld gegn Þór 40-49 í 1. deild kvenna en liðið náði mest 13 stiga forystu í þriðja leikhluta. Það var ljóst frá fyrstu mínútu leiksins að bæði liðin ætluðu sér sigur í leiknum enda einkenndist leikurinn af mikilli baráttu sem hafði áhrif á gæði körfuboltans lengst af. Þórsstelpur byrjuðu betur og höfðu yfir fyrstu mínúturnar en gestirnar komust yfir 7-9 og leiddu það sem eftir lifði leiks. Staðan eftir fyrsta leikhlutann var 9-18 gestunum í vil.

 

Þeir Ólafur Aron og Bjarki Ármann sem í sameiningu stýra liðinu í heimaleikjunum náðu að stappa stálinu í Þórsliðið sem kom ákveðið til leiks í öðrum leikhluta. Mikil barátta beggja liða út um allan völl einkenndi leikinn en Þór hafði betur í fjórðungnum 12-11 og gestirnir leiddu með 8 stigum í hálfleik 21-29.

 

 

Í þriðja leikhluta snérist svo dæmið aftur við og gestirnir voru ávallt skrefinu á undan og náðu mest 13 stiga forskoti. Þegar þriðja leikhlutanum lauk höfðu gestirnir 12 stiga forskot 30-42.

 

 

Í fjórða og síðasta leikhlutanum reyndu Þórsstelpur allt hvað þær gátu til að minnka muninn í leiknum. Með mikilli baráttu tókst þeim að vinna leikhlutann en þó ekki með nema þremur stigum 10-7 og gestirnir fögnuðu 9 stiga sigri 40-49.

 

Leikur liðanna var þrátt fyrir allt nokkuð fjörugur enda lögðu leikmenn beggja liða sig 100% fram. Tapaðir boltar og heldur slök skotnýting varð Þórsliðinu dýrkeypt. Varnaleikur liðsins var til fyrirmyndar eins og sést á stigaskori gestanna og er þetta næst minnsta stigaskor þeirra í mótinu til þessa.

 

 

Margrét Albertsdóttir og Erna Rún Magnúsdóttir voru stigahæstar í liði Þórs með 11 hvor. Hjá Gestunum var Tashawna Higgins stigahæst með 12 stig, Linda Þórdís Róbertsdóttir 10 og Briet Lilja Sigurðardóttir með 7.

 

 

Deildarkeppni
Nr.	Lið	U/T	Stig
1.	Breiðablik	5/0	10
2.	Fjölnir	4/1	8
3.	Tindastóll	4/2	8
4.	Stjarnan	4/2	8
5.	Grindavík b	2/3	4
6.	Þór Ak.	2/4	4
7.	FSu	1/5	2
8.	Laugdælir	0/5	0