Fyrri leikurinn fór fram á laugardag og fór rólega af stað og var jafn framan af en þegar rétt innan við 3 mínútur voru eftir af 1. leikhluta náðu heimastelpur 8-1 spretti og náðu með því 6 stiga forystu. Þær bættu svo aðeins við í öðrum leikhluta en Jenný lagaði stöðuna fyrir hálfleik með góðum þristi, staðan 39-28. Munurinn hélst þetta 7-10 stig út 3ja leikhluta en þegar rúmar 4 mínútur lifðu leiks setti Kristín Halla góðan þrist og náði 16 stiga forystu fyrir Tindastól. Þar með var þetta komið hjá heimastúlkum þó Hamar hafi náð upp ágætis baráttu í lokin og minnkað muninn þá virtist sigurinn aldrei í hættu.
Tess var stigahæst heimakvenna með 22 stig en Marín Lind kom rétt á eftir með 16. Telma Ösp bætti við 9 stigum og eins Karen Lind, sem bætti að auki við 7 fráköstum. Liðsheildin hjá Tindastól var góð og dýptin á bekknum vel nýtt hjá þjálfaranum. Hjá Hamar var Jenný Harðardóttir stigahæst með 22 stig en skammt á eftir kom Álfhildur Þorsteinsdóttir með 17 stig og 18 fráköst, tröllatvenna það hjá Álfhildi.
Leikurinn á sunnudeginum fór rólega af stað og liðnar voru 2 mínútur þar til fyrstu stigin komu á töfluna. Þau komu frá gestunum sem bættu svo í og komust í 0-5 áður en heimastúlkur vöknuðu og var það Telma Ösp sem jafnaði leikinn í 5-5 upp á sitt einsdæmi á næstu mínútu. Jafnt var nánast út leikhlutann en Tindastóll náði að ljúka honum með forystu 21-18. Munurinn jókst svo jafnt og þétt fram að hálfleik en Dagrún Inga náði að laga stöðuna fyrir hálfleik með þristi, 41-29 fyrir Tindastól í hálfleik. Í þriðja leikhluta fór að bera á þreytu hjá gestunum sem hafa ekki eins mikla breidd í hópnum og Tindastóll. Heimastúlkur gengu á lagið og náðu 17 stiga forystu, 60-43 að loknum 3ja leikhluta. Hamar gekk ekkert að minnka þann mun og svo fór að Tindastóll fór með öruggan 20 stiga sigur af hólmi, lokatölur 78-58.
Tess átti aftur góðan leik fyrir Tindastól með 25 stig og 9 fráköst. Helst bar til tíðinda að hún klikkaði á víti sem hefur ekki gerst áður á tímabilinu. Telma Ösp og Hrefna bættu við 13 stigum hvor og alls fékk Tindastóll 24 stig af bekknum í leiknum, sem er frábært. Hamarsstúlkur virkuðu þreyttar eins og áður segir en þeirra stigahæst var Jenný með 20 stig og hún reif niður 11 fráköst að auki.
Umfjöllun, myndir, viðtöl / Hjalti Árna