NBA deildin íhugar nú að breyta forminu á sjálfum úrslitum keppninnar í 2-2-1-1-1 kerfið en í dag eru úrslitin leikin 2-3-2 sem þýðir að það lið sem fer inn í úrslitin með betra sigurhlutfall úr deildarkeppninni fær tvo fyrstu heimaleikina í úrslitum. Andstæðingarnir fá svo þrjá heimaleiki í röð og fyrra liðið síðustu tvo heimaleikina.
Mótanefnd NBA samþykkti einróma þessa breytingu á dögunum en eigendur NBA liða munu kjósa um þessa niðurstöðu nefndarinnar á fundi sínum í næsta mánuði. Ef þessi ákvörðun verður samþykkt að fara með úrslitin aftur í 2-2-1-1-1 formið er ekki víst hvort farið verði strax í að innleiða þessa breytingu á komandi keppnistímabili.
Árið 1985 var kerfinu breytt í 2-3-2 fyrirkomulagið en sú tillaga, að sögn David Stern framkvæmdastjóra NBA, átti rætur sínar að rekja til gamla Boston Celtics þjálfarans Red Auerbach sem vildi draga úr langferðalögunum þegar Boston og Lakers voru hvað tíðast að mætast í úrslitum deildarinnar.
Allar aðrar umferðir í úrslitakeppni NBA, að frátöldum úrslitunum sjálfum, notast við 2-2-1-1-1 kerfið.
