Þór Akureyri jafnaði úrslitaeinvígið gegn Valsmönnum í 1. deild karla og því verður oddaleikur á Akureyri næsta miðvikudagskvöld þar sem ræðst hvort Þór Akureyri eða Valur leikur í Iceland Express deild karla á næstu leiktíð. Liðin mættust í Vodafonehöllinni að Hlíðarenda í kvöld þar sem Þór hafði nauman 73-76 spennusigur á Val. Nú hafa liðin mæst fjórum sinnum í deildinni, tvisvar í deildarkeppni og tvisvar í úrslitakeppni og ávallt hefur verið um útisigur að ræða! Það má því búast við mögnuðum slag þessara liða á miðvikudag.
Byrjunarlið
Valur: Calvin Wooten, Philip Perre, Hörður Hreiðarsson. Björgvin Valentínusson og Sigmar Egilsson
Þór Akureyri: Konrad Tota, Wesley Hsu, Dimitar Petrushev, Óðinn Ásgeirsson og Ólafur Torfason.
Valsmenn byrjuðu betur og komust í 6-2 en talsverð taugaveiklun virtist vera í Þórsliðinu sem tapaði mörgum boltum á fyrstu mínútum leiksins. Liðin byrjuðu geyst og mistök slæddu sér inn hjá báðum aðilum. Valsmenn tóku þó frumkvæðið og komust í 16-8 þegar gestirnir tóku leikhlé.
Konrad Tota setti svo stóran þrist undir lok upphafsleikhlutans fyrir Þór en heimamenn í Val leiddu 18-15 að honum loknum.
Snemma í öðrum leikhluta komust gestirnir yfir 20-21 en bæði lið voru áfram fremur mistæk í sínum aðgerðum. Valsmenn skriðu svo fram úr þegar leið á leikhlutann og leiddu 39-35 í hálfleik.
Hálfleikstölur:
Valur: Calvin Wooten 14 stig og 6 stoðsendingar, Philip Perre 15 stig og 6 fráköst
Þór: Óðinn Ásgeirsson 12 stig og 5 fráköst, Konrad Tota 11 stig, Ólafur Torfason 8 fráköst
Hægt og bítandi færðust Þórsarar nærri í síðari hálfleik. Wesley Hsu setti stóran þrist fyrir gestina og minnkaði muninn í 47-46 . Þegar um fjórar mínútur voru eftir af þriðja leikhluta komust Þórsarar yfir 52-53 en Valsmenn létu forystuna ekki af hendi og leiddu 62-59 fyrir lokasprettinn.
Mönnum var áfram nokkuð mislagðar hendur í sóknarleiknum í fjórða leikhluta en saman töpuðu liðin 45 boltum í leiknum og marga þeirra mátti skrifa á mikilvægi leiksins sem oft virtist flækjast fyrir mönnum. Petrushev var þó ekki stressaður þegar hann jafnaði fyrir Þór 64-64 með þrisggja stiga körfu og við það tóku gestirnir á rás og bættu í með tíu stiga áhlaupi til viðbótar og staðan snöggtum orðin 64-74 þegar rúmar fjórar mínútur voru til leiksloka.
Valsmenn létu deigan ekki síga og svöruðu með 9-0 áhlaupi og staðan 73-74 Þór í vil þegar 1.16 mínútur voru eftir. Þegar 14 sekúndur voru svo til leiksloka braust Petrushev í gegnum Valsteiginn og jók muninn í 73-76 Þór í vil. Yngvi Gunnlaugsson tók strax leikhlé fyrir heimamenn sem settu upp í síðustu sóknina.
Björgvin Valentínusson reyndist fá lokaskot Valsmanna í kvöld, fékk boltann niðri í vinstra horni fyrir utan þriggja stiga línuna. Björgvin setti upp gott skot sem rétt missti marks og Ólafur Torfason stökk á frákastið, hans fimmtánda í leiknum, og Þórssigurinn í höfn, 73-76. Oddaleikur á miðvikudag þar sem allt verður undir, sætið í Iceland Express deild karla á næstu leiktíð.
Heildarskor:
Valur: Calvin Wooten 32/5 fráköst/9 stoðsendingar/6 stolnir, Philip Perre 19/8 fráköst/5 stolnir/4 varin skot, Sigmar Egilsson 7/6 fráköst, Björgvin Rúnar Valentínusson 6/5 fráköst, Hörður Helgi Hreiðarsson 6/6 fráköst, Alexander Dungal 3, Pétur Þór Jakobsson 0, Hörður Nikulásson 0, Benedikt Blöndal 0, Birgir Björn Pétursson 0/5 fráköst, Snorri Páll Sigurðsson 0.
Þór Ak.: Konrad Tota 20/5 fráköst/3 varin skot, Dimitar Petrushev 16/4 fráköst, Óðinn Ásgeirsson 16/10 fráköst/4 varin skot, Ólafur Torfason 13/15 fráköst/8 stolnir, Wesley Hsu 9, Hrafn Jóhannesson 2, Björn B. Benediktsson 0, Hjalti Magnússon 0, Benedikt Eggert Pálsson 0, Baldur Már Stefánsson 0, Sindri Davíðsson 0.
Dómarar: Kristinn Óskarsson, Einar Þór Skarphéðinsson
Ljósmynd/ Tomasz Kolodziejski – [email protected]
Umfjöllun/ Hannes Birgir Hjálmarsson
