U16 kvennalandslið Íslands lék gegn Finnlandi á Norðurlandamótinu í dag. Finnska liðið er gríðarlega sterkt og tókst íslenska liðinu ekki að svara þeirra leik í dag.
Umfjöllun um helstu þætti leiksins má finna hér að neðan:
Gangur leiksins:
Finnska liðið pressaði hátt á völlinn snemma í leiknum og þrátt fyrir að íslenska liðið hafi verið undir það búið var það ekki tilbúið til að fylgja því eftir á vellinum. Íslenska liðið gerði þó vel að koma aftur inní leikinn og var staðan 4-6 í fyrsta leikhluta. Eftir það gekk Finnland á lagið.
Finnska liðið barðist gríðarlega og eru líkamlega sterkari en Ísland. Þær fengu margar auðveldar körfur þar sem íslenska liðið tapaði full mörgum boltum framarlega á vellinum. Eftir fylgdi að sjálfstraustið minnkaði og vonleysið varð mikið á kafla hjá Íslandi. Staðan í hálfleik 18-47 fyrir Finnlandi.
Það var aftur á móti ljóst snemma í seinni hálfleik að íslensku leikmennirnir ætluðu að skilja allt eftir á gólfinu og ganga stoltar frá borði. Leikmenn fengu meiri trú á eigin hæfileikum og tókst að keyra fínar sóknar og vörðust ágætlega þegar þeim tókst að stilla upp í stað þess að fá á sig auðveldar körfur úr hraðaupphlaupum.
Holan var aftur á móti orðin of djúp og íslenska liðið gat ekki komið til baka. Lokastaðan 35-85 gegn ógnarsterku finnsku liði.
Leikmenn leiksins:
Ásta Júlía Grímsdóttir og Ólöf Rún Óladóttir voru sterkustu menn Íslands í dag. Voru óhræddar við að keyra að körfunni og spila gegn þessu sterka liði. Þær voru saman með 19 af 35 stigum Íslands í leiknum og liðinu gekk best með þær inná.
Kjarninn:
Líklega var Ísland að spila við besta liðið á þessu móti og jafnvel er bara fínt að klára það af strax í fyrsta leik. Lið var vel undirbúið undir að mæta pressu finnska liðsins en tókst ekki að framkvæma það á vellinum. Finnland var einfaldlega sterkara líkamlega og meira undirbúið í bardaga. Körfuboltahæfileikar Íslands eru hinsvegar til staðar þegar þær losuðu pressuna og tókst að stilla upp í sókn og vörn.
Það er nóg eftir á mótinu og nú á liðið að vera búið að fá forsmekkinn af baráttunni sem er á mótinu. Ísland mætir Noregi á morgun og eiga hellings möguleika gegn þeim.
Viðtöl eftir leik:
Umfjöllun, myndir og viðtöl: Ólafur Þór Jónsson