Stjórn körfuknattleiksdeildar Tindastóls hefur ákveðið að karlalið félagsins taki þátt í ENBL (European North Basketball League) tímabilið 2026–2027. Einnig var skoðað að taka þátt í FIBA Europe Cup, en það hefði krafist tíu leikja frá október og fram að jólum sem stjórnin mat nánast ógerlegt fyrir norðlenskt félag.
Fyrirkomulag ENBL hentar liðinu mun betur en Tindastóll mun leika þrjá leiki í einni ferð erlendis í lok september, sem nýtist vel í undirbúningi fyrir veturinn. Á tímabilinu sjálfu verða fjórir heimaleikir spilaðir á Sauðárkróki, ásamt einum stökum útileik. Allir heimaleikir Tindastóls, ásamt útileikjum, verða sýndir í beinni á Tindastóll TV.
