13:31
{mosimage}
(LeBron James á víst erfitt með að hemja hesta sína í kringum Ragnheiði sunddrottningu)
Ólympíuleikarnir eru nú í algleymingi og í gær hófst keppni í körfuknattleik og þegar er um tíu leikjum lokið í karla- og kvennakeppni og nú kl. 14.10 verður leikur Bandaríkjanna og Kína í beinni útsendingu hjá RÚV (samkvæmt þeirra áætlun). Þar mætast stálin stinn því Bandaríkjamenn eru jafnan fánaberar kapítalismans og Kínverjar á öndverðum meiði sem kommúnistaríki og hafa átt töluvert undir högg að sækja í heimspressunni. Kappar á borð við blaðamennina Henry Birgi Gunnarsson og Sigurð Elvar Þórólfsson hafa þó tekið upp hanskann fyrir Kínverja og segja magnaðar sögur af dvöl sinni ytra á meðan þeir fylgjast með framvindu íslensku keppendanna.
Sunddrottningin Ragnheiður Ragnarsdóttir hefur í Peking átt vingott við þá Jason Kidd og LeBron James en ítrekar að þetta séu aðeins vinasambönd eins og kom fram í viðtali hjá Henry Birgi. Þar sagði Ragnheiður að NBA stjörnurnar hefðu jafnvel áhuga á því að skipuleggja helgarferð til Íslands. Þessi vinabönd Ragnheiðar gætu reynst mikill happafengur fyrir íslenskan körfuknattleik enda íslensku landsliðin á meðal B-þjóða í Evrópukeppnunum og sökum nöturlegs fyrirkomulags þá vilja bestu þjóðir Evrópu alls ekki spila á móti smáríkjum á borð við Ísland. Heimsókn til Íslands frá NBA stjörnum væri því eflaust vel þegin og á svipstundu varð sunddrottningin Ragnheiður Raganarsdóttir einhver sterkasti sendiherra íslensks körfuknattleiks. En áður en við veitum Ragnheiði gullmerki KKÍ þá skulum við aðeins líta á það sem hefur verið að gerast í körfunni í Peking.
Fyrsti körfuboltaleikurinn á mótinu var millum Hvít-Rússa og Ástrala þar sem Ástralía fór með öruggan 83-64 sigur af hólmi. WNBA leikmaðurinn Lauren Jackson gerði 18 stig og tók 10 fráköst fyrir Ástrali. Fyrsti karlaleikurinn á Ólympíuleikunum var viðureign Rússa og Írana þar sem Rússar unnu örugglega 71-49. Til þess að sjá öll úrslit og næstu leiki á Ólympíuleikunum er hægt að smella hér.
Þá er einnig hægt að smella hér til þess að nálgast beinar netútsendingar frá körfuboltaleikjum á Ólympíuleikunum. Þá er ennfremur hægt að smella hér til þess að nálgast körfuboltadagskrá RÚV frá Ólympíuleikunum.
Leikið verður alveg fram til 24. ágúst en úrslitaleikur kvenna fer fram laugardaginn 23. ágúst og hefst kl. 22:00 í Peking en þá verður kl. 06:00 að sunnudagsmorgni hér á Íslandi. Þá hefst úrslitaleikur karla kl. 14.30 að staðartíma í Peking eða kl. 22.30 hér á Íslandi og fyrir NBA áhugamennina ætti ekki að vera neitt vandamál að liggja yfir einum úrslitaleik Ólympíuleikanna á þessum tíma.
