17:35
{mosimage}
Stjarnan sigraði Val sannfærandi 100-84 í oddaleik liðanna í gærkvöld um það hvort liðið fylgdi Þór frá Akureyri í úrvalsdeild að ári.
Stjörnumenn byrjuðu leikinn mun betur og komust fljótlega í 11-3 með frábærri vörn og mikilli baráttu. Valsmenn náðu hinsvegar að komast inn í leikinn undir lok fjórðungsins en Stjarnan hafði yfirhöndina. 22-16 eftir 10 mínútur.
Liðin voru mjög jöfn framan af öðrum leikhluta. Góð vörn var spiluð á báða bóga og skipst á stigum en um miðjan leikhlutann seig Stjarnan fram úr og komst í þægilega forystu. En Valsarar voru ekki á þeim buxunum að gefast upp og með nokkrum þristum var forskot Stjörnunnar komið í 3 stig, 41-38 og þannig var staðan í hálfleik.
Bæði lið mættu dýrvitlaus til leiks í 3. leikhluta. Stjörnumenn skoruðu meira til að byrja með en náðu ekki að hrista baráttuglaða Valsara af sér því Zach Ingles fékk fjölmörg vítaskot sem hann nýtti öll. Mikill hiti var í mönnum og Valsmenn lentu í villuvandræðum en Ragnar Steinsson fékk dæmda á sig sóknarvillu, hans 4. villa í leiknum. Í kjölfarið fengu Valsmenn dæmda á sig tæknivillu og virtist það slökkva alveg í baráttueldinum þeirra megin, en kyndlaði mikið bál í brjóstum Stjörnumanna því þeir hreinlega völtuðu yfir Valsara og komust á tímabili í 22 stiga forskot. Þar fór fremstur í flokki Sigurjón Lárusson en hann átti frábæran leik og skoraði alls 30 stig. Staðan í lok 3. leikhluta var 68-53 Stjörnunni í vil.
Valur var kominn í þó nokkur villuvandræði fyrir 4. leikhluta og í byrjun hans fór Guðjón Hauksson út af með sína 5. villu á bakinu en Guðjón barðist mjög vel allan leikinn og tók þó nokkur fráköst. Alls fóru fjórir Valsarar útaf með 5 villur í leikhlutanum, þar á meðal Zach Ingles en Zach skaut boltanum ekki vel í síðustu tveim leikjum seríunnar. Stjörnumenn settu hins vegar fulla ferð áfram og dyggilega studdir af fjölmörgum Garðbæingum sem létu sig ekki vanta í Kennaraháskólann, unnu þeir stórsigur 100-84 og fögnuðu gríðarlega í leikslok.
Atkvæða mestir hjá Stjörnunni voru Sigurjón Lárusson með 30 stig en Sigurjón spilaði frábærlega í úrslitaseríunni, og Ben Bellucci með 20 stig, 11 fráköst og 7 stoðsendingar.
Það verður því Stjarnan úr Garðabæ sem mun fylgja Þór frá Akureyri upp í Iceland-Express deildina en Valsmenn sitja heima með sárt ennið. Síðast þegar Stjarnan lék í úrvalsdeild var veturinn 2001-2002. Þá unnu þeir ekki einn einasta leik. Hvað gerist í þetta sinn?
Texti: Elías Guðmundsson
Mynd: www.vikurfrettir.is – Valur Jónatansson
