Ísland hefur lokið þátttöku sinni í undankeppni Evrópumeistarmóts A-landsliða karla en liðið fékk skell áðan í sínum síðasta leik gegn Eistlandi ytra. Lokatölur leiksins voru 80-58 Eistlandi í vil en Jón Arnór Stefánsson var stigahæstur í íslenska liðinu með 13 stig og Jakob Örn Sigurðarson bætti við 12 stigum. Þá var Hlynur Elías Bæringsson með 11 stig og 10 fráköst.
Eistar leiddu 24-22 að loknum jöfnum fyrsta leikhluta en þeir unnu annan leikhluta 23-10 og lögðu þar grunninn að sigri sínum í leiknum. Nýting íslenska liðsins í leiknum var afleit eða 36% í teignum, 22,7% í þriggja stiga skotum og 61,1% á vítalínunni.
Fyrir leikinn í dag var Ísland í næstneðsta sæti A-riðils í keppninni en Slóvakar sem voru í neðsta sæti riðilsins leika síðar í kvöld og þá ræðst endanlega staðan í riðlinum. Þrátt fyrir að leikjum dagsins sé ekki lokið er ljóst að Ísland kemst ekki upp úr riðlinum og hefur lokið keppni á þessu móti.
Strákunum okkar tókst að vinna einn leik og það var gegn Slóvakíu á útivelli en aðrir leikir riðilsins töpuðust þó nokkrum stórþjóðum hefði verið velgt verulega undir uggum.
