Körfuknattleiksdeild Fjölnis samdi í gær við sjö af leikmönnum sínum um áframhaldandi veru hjá félaginu í 1. deild á næstu leiktíð.
Þetta eru Róbert Sigurðsson, Garðar Sveinbjörnsson, Sindri Már Kárason, Valur Sigurðsson, Hreiðar Bjarki Vilhjálmsson, Alexander Þór Hafþórsson og Bergþór Ægir Ríkharðsson.
Róbert lék 30 mínútur í leik í vetur og skoraði 10 stig og var með 5 stoðsendingar í leik. Garðar var með 6,5 stig í leik á 22 mínútum og var besta vítaskytta liðsins á nýliðinni leiktíð með 81,3% nýtingu á línunni. Sindri lék 18 mínútur í leik og skoraði 7,2 stig og tók 4,5 fráköst í leik. Valur spilaði 18 mínútur í leik fyrir Fjölni á nýliðinni leiktíð og skoraði 3,2 stig að viðbættum tæplega 2 stoðsendingum.
“Körfuknattleiksdeild Fjölnis er ákaflega stolt af þessum strákum og hlökkum til næsta tímabils,” sagði á Facebook síðu Fjölnis í dag.
** Uppfært: Í fyrri útgáfu fréttarinnar vantaði nöfn Heiðars, Alexanders og Bergþórs og hefur þeim nú verið bætt við. **
Mynd: Róbert Sigurðsson og Hjalti Þór Vilhjálmsson, þjálfari Fjölnis handsala samkomulagið í gær. (Facebook / Fjölnir)
