Valur gerði góða ferð til Svíþjóðar um helgina þar sem fimm lið frá félaginu tóku þátt í hinu árlega Lampe-móti í Stokkhólmi, sem nú var haldið í tuttugasta sinn. Alls kepptu 159 lið á mótinu sem fram fór á þremur dögum, en því er skipt upp í opinn flokk og úrvalsflokk (Elite) í öllum aldursþrepum. Valur, sem hefur sent lið á mótið síðustu fjögur ár, tefldi fram tveimur liðum í opnum flokki og þremur í úrvalsflokki og var uppskera helgarinnar afar söguleg fyrir félagið.
Hápunktur helgarinnar var öflugur sigur strákanna í áttunda flokki, fæddra 2012, sem fóru alla leið og sigruðu í úrvalsdeild drengja undir 14 ára. Innan þeirra raða var Dominik K. Ágústsson valinn besti leikmaður mótsins og Ísak Alvar Agnarsson leikmaður úrslitaleiksins. Þá tókst strákunum í níunda flokki, fæddum 2011, að tryggja sér silfurverðlaun í opnum flokki undir 15 ára eftir þrjá sigra í fjórum leikjum, þar sem Benedikt Tumi Aronsson var valinn maður úrslitaleiksins. Stelpurnar í níunda flokki enduðu í fimmta sæti í sínum úrvalsflokki og stelpurnar í áttunda flokki, nýkrýndir Íslandsmeistarar, luku leik í sjötta sæti eftir gríðarlega jafna leiki. Að lokum enduðu strákarnir í Val hvítum í sjöunda sæti í opna flokknum eftir sigur í lokaleik sínum.
