Aga- og úrskurðarnefnd Körfuknattleikssambands Íslands hefur kveðið upp nýjustu úrskurði sína þar sem fimm aðilar úr efstu deildum karla hafa verið sektaðir fyrir brot á reglugerð um aga- og úrskurðarmál. Þungar sektir voru boðaðar vegna uppsafnaðra tæknivillna á tímabilinu, en þeir Kristófer Acox, leikmaður Vals, Seth LeDay, leikmaður Stjörnunnar, og Bjarmi Skarphéðinsson, þjálfari Selfoss, þurfa allir að greiða 30.000 krónur hver fyrir að hafa hlotið sex tæknivillur.
Gísli Hallsson, leikmaður Sindra, kemur talsvert við sögu í þessari úrskurðarlotu en hann hlaut tvær aðskildar sektir. Annars vegar var hann sektaður um 15.000 krónur vegna háttsemi sinnar í leik gegn Selfossi sem fram fór þann 20. apríl síðastliðinn og hins vegar þarf hann að greiða 20.000 krónur vegna fjögurra tæknivillna sem hann hefur safnað á sig á yfirstandandi tímabili. Samtals nemur sekt Gísla því 35.000 krónum samkvæmt ákvörðun nefndarinnar.
Allir úrskurðirnir eru byggðir á 13. grein reglugerðar KKÍ um aga- og úrskurðarmál, sem kveður á um sjálfkrafa sektargreiðslur þegar leikmenn eða starfsmenn liða fara yfir ákveðinn fjölda tæknivillna eða gerast sekir um óprúðmannlega framkomu.
