Ráðast örlög Skallagríms og Fjölnis í kvöld?

Í kvöld lýkur 21. umferð í Domino´s deild karla og þá gætu örlög Fjölnis og Skallagríms ráðist en Borgnesingar mæta í Hertz-Hellinn og leika þar einn stærsta leik tímabilsins til þessa. Botnbarátta deildarinnar hefur verið blóðug og hún getur ráðist í kvöld! Viðureign ÍR og Skallagríms verður í beinni á Stöð 2 Sport en ef ÍR vinnur tryggir liðið sér áframhaldandi sæti í deildinni og fellir þar með Fjölni og Skallagrím. Ef Borgnesingar vinna þá sendum við stærðfræðingana okkar á ykkur síðar í kvöld.

 

 

Ef við svo lítum yfir til Keflavíkur og Njarðvíkur þá eru þessi tvö öflugu körfuboltavígi einnig að standa fyrir stórleikjum í kvöld. Snæfell er að spila hreinan úrslitaleik um sæti í sjálfri úrslitakeppninni þegar þeir heimsækja Keflavík, Hólmurum dugir ekkert annað en sigur til að vera með. Keflvíkingar eru ekki úr allri hættu og þurfa sigur í kvöld og þá geta þeir bókað farseðilinn í úrslitakeppnina endanlega.

 

Í Ljónagryfjunni er önnur staða uppi á teningnum, bæði Njarðvík og Stjarnan verða í úrslitakeppninni, það er staðfest. Nú erum við að horfa á röðun, þ.e. baráttuna um heimaleikjaréttinn. Njarðvík í 4. sæti með 24 stig en Stjarnan í 5. sæti með 22 stig. Heimavallarárangur Njarðvíkinga hefur oft verið betri, 6-4 staða á meðan Garðbæingum hefur lítið gengið á útivelli þetta tímabilið (3-7).

 

Í öllu falli þá eru þrjú körfuhús að bjóðast til að hýsa ykkur í kvöld og þau verða með veisluborð svo látið ykkur ekki vanta! 

 

 

ÍR – Skallagrímur (beint á Stöð 2 Sport)

Keflavík – Snæfell

Njarðvík – Stjarnan

 

Deildarkeppni
Nr.	Lið	U/T	Stig
1.	KR	19/2	38
2.	Tindastóll	16/5	32
3.	Haukar	12/9	24
4.	Njarðvík	12/8	24
5.	Stjarnan	11/9	22
6.	Grindavík	11/10	22
7.	Keflavík	10/10	20
8.	Þór Þ.	10/11	20
9.	Snæfell	8/12	16
10.	ÍR	5/15	10
11.	Fjölnir	5/16	10
12.	Skallagrímur	4/16	8