Hörður Axel Vilhjálmsson og félagar fengu stopp um helgina þegar Mitteldeutcher BC varð að láta í minni pokann gegn ETB Wohnbau Basketes í þýsku Pro A deildinni. Lokatölur 81-75 ETB í vil á fyrnasterkum heimavelli MBC. Með sigrinum komst ETB í 9. sæti deildarinnar en þrátt fyrir tapið er MBC enn á toppi deildarinnar með 32 stig, 16 sigra og 4 tapleiki.
Hörður Axel gerði 10 stig í leiknum, stal 3 boltum, tók 1 frákast og gaf 1 stoðsendingu á rétt rúmum 30 mínútum. Nú er 22 umferðum lokið í deildinni sem telur alls 30 umferðir. Hörður er í 37. sæti yfir stigahæstu leikmenn deildarinnar með 11,5 stig að meðaltali í leik.
Næsti leikur MBC í deildinni er gegn Cuxhaven sem í dag sitja í 12. sæti.
Mynd/ Matthias Kuch – Hörður Axel á ferðinni með MBC.
