„Að fá Matthías inn er auðvitað alveg frábært fyrir okkur enda um að ræða gríðarlega efnilegan og spennandi bakvörð. Ég hef þekkt Matta lengi og fylgst vel með kappanum í gegnum árin, hann mun falla vel inn í okkar hóp,“ sagði Örvar Þór Kristjánsson þjálfari ÍR um nýjasta liðsmann þeirra í Hertz-Hellinum, Matthías Orra Sigurðarson sem í gær fékk lausn undan samningi hjá KR.
„Ég skil vel að Matthías hafi viljað breyta til eftir komu Pavels í KR. Pavel er einn af okkar fremstu leikmönnum og Matti sá fram á að tækifærin yrðu af skornum skammti. Held að þessi vistaskipti eigi eftir að verða leikmanninum gæfurík sem og ÍR,” sagði Örvar en með tilkomu nýja mannsins hvernig leggst þá veturinn í hann?
„Veturinn leggst bara vel í mig. Við höfum bætt við okkur Bigga, Bjögga og Matta ásamt því að hér hjá ÍR eru til flottir strákar sem eiga eftir að stimpla sig rækilega inn í deildina í vetur. Eldri leikmennirnir í hópnum eru í flottum gír svo við erum brattir. Vissulega erum við svolítið óskrifað blað en okkur hlakkar mikið til vetrarins.“
Mynd/ Örvar Þór samdi við ÍR í sumar og hefur liðið tekið umtalsverðum breytingum síðan þá.
