Hér fyrir neðan eru nokkur af þeim atriðum sem Körfunni hafa borist til eyrna á síðustu dögum er varða leikmenn, þjálfara og félög á Íslandi. Tekið skal fram að hér er um að ræða óstaðfestar fregnir og því ber að taka þeim sem slíkum.
- Fyrrum þjálfari Þórs Akureyri í Bónus deild kvenna Daníel Andri Halldórsson er sagðu hafa náð munnlegu samkomulagi um að verða næsti þjálfari Keflavíkur í Bónus deild kvenna.
- Leikmaður nýliða KR í Bónus deild kvenna á næsta tímabili Rebekka Rut Steingrímsdóttir er sögð vera með tilboð á borðinu frá nokkrum öðrum liðum Bónus deildarinnar, en talið er líklegt að hún gangi til liðs við Stjörnuna fari svo að hún verði ekki áfram í Vesturbænum.
- Samkvæmt orðinu á götunni mun leikmaður Álftaness Hörður Axel Vilhjálmsson íhuga það sterklega að leggja skóna á hilluna að loknu yfirstandandi tímabili.
- Þá er leikmaður Hamars Ragnar Nathanaelsson einnig að íhuga að setja skóna á hilluna samkvæmt orðinu á götunni, sama hvort lið hans kemst upp í Bónus deildina eða ekki.
- Leikmaður Hauka Everage Richardson er sagður vilja spila áfram í efstu deild, en líklegir áfangastaðir fyrir hann eru taldir Þór Þorlákshöfn, ÍA eða Álftanes.
- Orðið á götunni er það að í ný regla um erlenda atvinnumenn verði þannig að það geti aðeins verið fjórir slíkir á skýrslu í hverjum leik efstu deilda á næsta tímabili og engar kvaðir verði með hversu margir þeirra verði inná vellinum í einu.
- Ungstirni Hauka Birkir Hrafn Eyþórsson er sagður skoða tilboð frá bandarískum háskólum fyrir komandi tímabil.
- Nýliðar ÍA eru sagðir stórhuga fyrir tímabilið í Bónus deild karla. Sögusagnir eru á kreiki að þeir séu á höttunum eftir tveimur leikmönnum KR þeim Lars Erik Bragasyni og Friðriki Antoni Jónssyni.
- Einnig talinn líklegur til þess að ganga til liðs við ÍA er Reynir Bjarkan leikmaður Þórs Akureyri.
- Fyrrum yngri landsliða leikmaðurinn Óli Gunnar Gestsson er samkvæmt orðinu á götunni á leiðinni til Íslands aftur eftir að hafa verið við nám í Bandaríkjunum síðustu ár. Líklegast er talið að hann gangi til liðs við uppeldisfélag sitt í KR, en þá hafa ÍA og Ármann einnig verið nefndir sem mögulegir áfangastaðir.
- Austanmaðurinn Gísli Þórarinn Hallsson er sagður líklegur til að yfirgefa Sindra fyrir komandi tímabil og leika fyrir lið á höfuðborgarsvæðinu. Þar hafa Haukar, Valur og Álftanes öll verið nefnd sem líklegir áfangastaðir.
- Leikmenn Keflavíkur bræðurnir Sigurður og Hilmar Péturssynir eru sagðir líklegir til að yfirgefa Bítlabæinn fyrir komandi tímabil. Sigurður hefur verið orðaður við KR, Hauka, Stjörnuna og Val á meðan bróðir hans hefur verið orðaður við KR, Hauka, ÍA og Tindastól.
- Talið er líklegt að faðir þeirra Pétur Ingvarsson muni taka við nýliðum Hauka í fyrstu deild karla af Friðriki Inga Rúnarssyni.
- Samkvæmt orðinu á götunni er ÍR-ingurinn Magnús Dagur Svansson í viðræðum við nokkur lið, þar á meðal Snæfell og Sindra í fyrstu deildinni.
- Leikmaður Hattar Nemanja Knezevic hefur samkvæmt orðinu á götunni fengið tilboð frá Sindra sem hann á að hafa tekið alvarlega.
- Samkvæmt öðrum orðrómi mun Pétur mögulega vera taka við Þór í Þorlákshöfn og þangað muni hann hafa son sinn Hilmar Pétursson með. Það orð segir einnig að Lárus Jónsson muni taka við karlaliði Keflavíkur og að hann vilji halda hinum bróðurnum, Sigurði Péturssyni, áfram í Keflavík
- Þá er Hugi Hallgrímsson leikmaður Hauka talinn líklegur til þess að ganga til liðs við ÍR.
- Bróðir Huga og liðsfélagi hjá Haukum Hilmir Hallgrímsson er talinn líklegur til þess að ganga til liðs við Skallagrím.
- Þá er Kristófer Breki Björgvinsson leikmaður Hauka talinn hafa átt í viðræðum við nokkur úrvalsdeildarfélög, en líklegast er talið hann muni ganga til liðs við KR eða Val, fari svo hann yfirgefi Hauka.
- Þröstur Leó Jóhannsson er ekki talinn líklegur til að halda áfram með Þór Akureyri í fyrstu deild karla. Mögulegir arftakar hans þar hafa verið nefndir Chris Caird, Guðmundur Ingi Skúlason og Bjarki Ármann Oddsson.
- Sindri á Höfn eru sagðir á eftir leikmanni ÍR hinum danska Oscar Jorgensen.
Orðið á götunni er einungis til gamans og ef fólk hefur ábendingar um slúður skal hafa samband á [email protected]
