spot_img
HomeFréttirOrðið á götunni: Eru Keflvíkingar að bæta við sig þekktri stærð?

Orðið á götunni: Eru Keflvíkingar að bæta við sig þekktri stærð?

Hér fyrir neðan eru nokkur af þeim atriðum sem Körfunni hafa borist til eyrna á síðustu dögum er varða leikmenn, þjálfara og félög á Íslandi. Tekið skal fram að hér er um að ræða óstaðfestar fregnir og því ber að taka þeim sem slíkum.

  • Talið er líklegt að Keflavík styrki hóp sinn ennfrekar fyrir seinni hluta Subway deildar karla og oftar en ekki er nefnt að liðið muni bæta við tveimur atvinnumönnum, en ekki einum eins og talað var um fyrr í mánuðinum. Hávært er að annar þeirra leikmanna sem sé á leiðinni til þeirra sé aðdáendum íslensks körfuknattleiks þekktur, en eitt af þeim nöfnum sem hefur verið nefnt er Clayton Ladine, fyrrum leikmaður Hrunamanna og Breiðabliks.

  • Samkvæmt orðinu á götunni var Keflavík í harðri baráttu um að semja við Íslandsmeistarann Taiwo Badmus, en Valur hafi á endanum yfirboðið þá.

  • Taiwo þá annar leikmaðurinn sem Keflavík missir af núna í desember, en samkvæmt nokkuð öruggu orði götunnar var Veigar Páll Alexandersson einnig nálægt því að gerast leikmaður þeirra.

  • Þá er einnig talið að lið Keflavíkur í Subway deild kvenna muni bæta við sig erlendum atvinnumanni fyrir seinni helming tímabilsins.

  • Þá hefur heyrst að hin efnilega Erna Ósk Snorradóttir hafi yfirgefið herbúðir Keflavíkur og muni ganga til liðs við erkifjendur þeirra í Njarðvík.

  • Grindvíkingurinn Ingvi Þór Guðmundsson er sagður vera aftur á leiðinni á parketið eftir meiðsl og að valið standi á milli Þróttar og Skallagríms í fyrstu deildinni.

  • Þá hefur heyrst að leikmaður fyrrum Subway deildar liðs Breiðabliks Sóllilja Bjarnadóttir skoði þá möguleika að spila áfram og hafa bæði Fjölnir og KR verið nefndir sem líklegir áfangastaðir.

  • Kristján Fannar Ingólfsson leikmaður Stjörnunnar er talinn líklegur til að færa sig um set og ganga aftur í raðir Keflavíkur eða semja við Þrótt í fyrstu deildinni.

  • Heyrst hefur að Matija Jokic fyrrum leikmaður Grindavíkur sé enn á landinu og að mögulega muni hann semja við Álftnesinga eða Breiðablik fyrir seinni hluta Subway deildar karla, eða hann gangi til liðs við Sindra eða Skallagrím í fyrstu deildinni.

  • Samkvæmt orðinu hefur Álftanes einnig átt í viðræðum við fyrrum leikmann nokkurra liða í deildinni Sinisa Bilic.

  • Samkvæmt orðinu á götunni mun leikmaður Breiðabliks Everage Lee Richardson íhuga að ganga til liðs við Hauka nú á nýju ári.

  • Eyþór Lár Bárðarson leikmaður Snæfells er sagður vera með stórt tilboð á borðinu frá 2. deildar liði Vestra, en hann er ekki ákveðinn hvort hann slái til og færi sig vestur.

  • KR eru sagðir reyna að kaupa Jason Gigliotti leikmann Þórs Akureyri út úr samningnum sínum þar, en Haukar hafa einnig sýnt leikmanninum áhuga.

  • Leit Njarðvíkur í Subway deild kvenna að bandarískum leikmanni er sögð hafa verið erfið, en þær voru fyrr í mánuðinum orðaðar við fyrrum Íslandsmeistara Keflavíkur Brittany Dinkins.

  • Ragnar Örn Bragason leikmaður Þórs gæti skipt enn og aftur um lið og farið til baka í Breiðholtið á nýju ári.

  • Sá norski Atle Bouna er sagður hafa yfirgefið herbúðir Skallagríms í fyrstu deild karla.

  • Sæþór Elmar Kristjánsson er sagður gæti flutt aftur í bæinn eftir fá tækifæri með Hetti á yfirstandandi tímabili. Blikar, Fjölnir og Ármann hafa verið nefnd sem mögulegir áfangastaðir.

  • Heyrst hefur að forráðamenn Íslandsmeistara Tindastóls vinni enn hörðum höndum að því að fá leikheimild fyrir Jacob Calloway og að mögulega muni hann geta verið með þeim nú í janúar, en sagt er að erfiðlega hafi gengið að fá hann lausann undan samningi sem hann var á hjá KB Peja í Kósovó.

  • Þá hafa einnig heyrst allskonar sögur um hvort að leikmaður Grindavíkur Deandre Kane og leikmaður Hamars Jalen Moore muni koma aftur eftir hátíðirnar.

Orðið á götunni er einungis til gamans og ef fólk hefur ábendingar um slúður skal hafa samband á [email protected]

Fréttir
- Auglýsing -