OKC lögðu Clippers í Staples Center

Fjórir leikir fóru fram í NBA deildinni í nótt. LA Clippers tóku þá á móti Oklahoma City Thunder í Staples Center og máttu sætta sig við sigur gestaliðsins. Þá tapaði Boston á útivelli þegar liðið fór í heimsókn til Cleveland Cavaliers.

 

Kevin Durant var seigur með 32 stig, 7 fráköst og 7 stoðsendingar í liði Oklahoma. Hjá Clippers var Blake Griffin með 31 stig, 11 fráköst og 5 stoðsendingar. Chris Paul lék ekki með Clippers í leiknum en hann er enn að glíma við smávægileg hnémeiðsli.

 

Kyrie Irving fór hamförum gegn Boston og lét 40 stigum rigna yfir gestina. Þá var Irving einnig með 3 fráköst og 5 stoðsendingar. Hjá Boston var Rajon Rondo að gæla við þrennuna með 17 stig, 13 fráköst og 8 stoðsendingar.