Þróttur Vogum hefur náð samningum við Subway deildar lið Grindavíkur um að Nökkvi Már Nökkvason leiki með liðinu það sem eftir er af yfirstandandi tímabili. Staðfestir félagið þetta á samfélagsmiðlum sínum.
Nökkvi er að upplagi úr Grindavík, en lék á síðasta tímabili með Þrótti í annarri deildinni. Þar fór liðið alla leið í úrslit þar sem þeir töpuðu fyrir Ármanni.
Þróttur er sem stendur í efsta sæti deildarinnar enn taplausir eftir fyrstu 17 leiki deildarkeppninnar, en það verður svo skorið úr um hvaða lið fer upp í fyrstu deildina í úrslitakeppni.
Nökkvi er 23 ára gamall bakvörður sem leikið hefur fyrir Grindavík, Þrótt og Snæfell ásamt því að á sínum tíma hafa verið hluti af yngri landsliðum Íslands.
