Niðurstöður: Svona lítur lokahópurinn út hjá lesendum

Fyrir nokkrum vikum tilkynnti KKÍ 24 manna æfingahóp fyrir landsliðsverkefni sumarsins sem endar á Evrópumóti landsliða (EuroBasket) í Finnlandi. Á dögunum var hópurinn fækkaður niður í 19 leikmenn sem tóku þátt í æfingaleikjum gegn Belgíu í síðustu viku. 

Þessi hópur verður skorinn niður í 14-15 manna hóp áður en liðið fer til Rússlands næsta miðvikudag. Að lokum verður hann svo endanlega skorið niður í 12 leikmenn sem munu fara með liðinu á lokamót EuroBasket í Finnlandi í haust.

Eins og gengur eru misjafnar skoðanir á landsliðsvalinu, hver eigi að fara með og hver á að vera eftir. Karfan.is setti því af stað skoðanakönnun þar sem lesendur fengu kost á að velja sinn 12 manna hóp fyrir Eurobasket. Þátttakan var nokkuð góð og voru þátttakendur alls 1221 sem svöruðu spurningakönnun. Einungis var hægt að kjósa einu sinni á hverja tölvu. 

Vert er að taka fram að skoðanakönnunin fór fram að mestu leyti áður en hópurinn var minnkaður og hafði það því lítil áhrif á niðurstöðurnar. Könnun þessi var einungis gerð til gamans og hefur því ekki áhrif á niðurstöðu landsliðsþjálfarans. 

Það er ljóst að Craig Pedersen og hans aðstoðarmenn eru ekki öfundsverðir að þurfa að fækka í hópnum og velja lokahópinn. Hér að neðan má reyna að setja sig í þeirra spor og velja lokahópinn. Ísland leikur í A-riðli með Póllandi, Frakklandi, Grikklandi, Slóveníu og gestgjöfunum frá Finnlandi. Liðið hefur leik þann 31. ágúst gegn Grikklandi. Þangað til mun liðið leika átta æfingaleiki gegn sterkum þjóðum á borð við Litháen, Rússland, Ungverjaland og Belgíu.

Margt áhugavert kemur fram í niðurstöðunum hér að neðan. Meðal annars að Jón Arnór Stefánsson er með nærri 99% atkvæða en einungis 13 atkvæði innihéldu ekki Jón Arnór. Svipaða sögu er að segja um efstu fimm leikmennina, þeir fá allir yfirgnæfandi kosningu. 

Síðasti maður inn í hópinn er Ólafur Ólafsson leikmaður Grindavíkur. Hann tók ekki þátt í Eurobasket 2015 en þrettándi leikmaður hópsins og þar með sá sem rétt missir af sæti í liðinu er Brynjar Þór Björnsson en hann var einmitt í þeirri stöðu fyrir síðasta lokamót Eurobasket. Brynjar er einungis 15 atkvæðum frá því að komast í hópinn en Sigurður Þorsteinsson sem er 14. maðurinn í hópnum er 36 atkvæðum frá lokahópunum í þessari könnun. 

Sigtryggur Arnar Björnsson var næst síðastur í kosningunni en er enn í landsliðshópnum þrátt fyrir það. Neðstur er Gunnar Ólafsson en hann hefur leikið erlendis í þrjú ár og því íslenskum körfuboltaáhugamönnum að nokkru ókunnur þessa stundina. 

Ef lokahópurinn yrði eins og lokahópur lesenda Karfan.is er ljóst að fjórir leikmenn munu leika í fyrsta skipti á Eurobasket. Þeir Kristófer Acox, Elvar Már Friðriksson, Ólafur Ólafsson og Tryggvi Snær Hlinason voru ekki með íslenska liðinu á Eurobasket 2015. Raunar var sá síðast nefndi tiltölulega ný byrjaður að stunda körfubolta á þeim tíma, það er önnur saga.

Niðurstöður skoðannakönnunarinnar má finna í heild hér að neðan. Leikmönnum er raðað í rétta röð eftir atkvæðafjölda. Prósentuna má finna hjá leikmönnum 1-14 en þar fyrir neðan má einungis sjá rétta niðurröðun leikmanna samkvæmt niðurstöðunni.