New York lagði Lakers í Madison Square Garden

Þrír leikir fóru fram í NBA deildinni í nótt og þar mættust tvö stærstu markaðssvæðin þegar New York Knicks og LA Lakers leiddu saman hesta sína. Knicks hafði betur í leiknum og lokatölur 116-107 þar sem Carmelo Anthony setti 30 stig.

 

Kobe Bryant var stigahæstur í liði Lakers með 31 stig, 10 fráköst og 6 stoðsendingar en Knicks eru enn ósigraðir á heimavelli og hafa þar unnið alla níu leiki sína á tímabilinu og eru efstir í Atlantic riðli austurstrandarinnar með 17 sigra og 5 tapleiki. Lakers að sama skapi kunna ekkert allt of vel við sig á útivelli þessa vertíðina, eru 2 af 8 úti og hafa tapað síðustu fjórum deildarleikjum sínum.

 

Víst við erum að tala um tapleiki þá eru Bobcats enn við sama heygarðshornið og töpuðu í nótt sínum tíunda deildarleik í röð þegar liðið steinlá 113-90 gegn Atlanta á útivelli. Eins og flestum er kunnugt er Michael Jordan þarna innsti koppur í búri og spurning hvort einn mesti sigurvegari íþróttasögunnar þoli mikið lengur við.