Miami lagði Lakers

Níu leikir fóru fram í NBA deildinni í gær og í nótt. Meistarar Miami Heat lögðu Lakers og Boston Celtics mörðu Denver Nuggets eftir þríframlengdan hjartastyrkjandi leik!

 

LeBron James gerði 32 stig tók 7 fráköst og gaf 4 stoðsendingar í sigurliði Miami og Dwyane Wade bætti við 30 stigum og 5 stoðsendingum. Kobe Bryant var atkvæðamestur í liði Lakers með 28 stig, 6 fráköst og 9 stoðsendingar eða tveimur fleira en restin af liðsfélögum sínum samanlagt og leikur Bryant nú með stoðsendingamaskínunni Steve Nash…já raunveruleikinn er oft furðulegri en skáldskapurinn.

 

Paul Pierce var með svaðalega þrennu, 27 stig, 14 fráköst og 14 stoðsendingar í liði Boston! Jason Terry bætti svo við 26 stigum af bekknum hjá Boston. Í liði Denver var Ty Lawson með 29 stig, 6 fráköst og 9 stoðsendingar en Lawson kom Denver inn í fyrstu framlengingu þegar hann jafnaði af harðfylgi 92-92. Fyrsta framlengingin fór 7-7 og önnur framlengingin 8-8. Í þriðju framlengingunni var það Jason Terry sem mætti með risaþrist og kom Boston í 116-113 og áttu liðsmenn Denver ekki afturkvæmt eftir það.