Melo og Love báðir með 42 í nótt

The Show must go on söng einhver og það á vel við um NBA deildina svona korteri eftir Stjörnuleikshátíðina. Í gær voru bara 9 leikir í deildinni og þeir vestanhafs bættu um betur og splæstu í 11 leiki í nótt. LeBron James kom sjóðheitur af Stjörnuhelginni og setti 42 í gær, félagar hans frá Stjörnuhelginni þeir Carmelo Anthony og Kevin Love máttu ekki minni menn vera og settu báðir 42 stig í nótt.

 

 

Love og félagar gerðu sér lítið fyrir og lögðu sterka Pacers-menn. Love var 5-10 í þristum sjálfur framherjinn og auk stiganna 42 þá reif hann í sig 16 fráköst. Paul George var svo með 35 stig og 11 fráköst í liði Indiana.

 

 

Aðeins átta leikmenn Knicks klæddust búning í nótt svo Carmelo Anthony hefur fundið sig sérstaklega knúinn til þess að skora næstum helming stiganna. Við erum að tala um 16-29 í teignum og 2-6 í þristum og 42 stig. Hjá New Orleans var Eric Gordon með 28 stig.