Njarðvíkingurinn Lele Hardy hefur verið valin Domino´s leikmaður umferða 16-18 í úrvalsdeild kvenna. Nú er 19. umferð lokið í deildinni en lesendur Karfan.is hafa síðustu daga getað kosið um Domino´s leikmanninn og þar var Njarðvíkingurinn Hardy hlutskörpust.
Hardy fékk 49,54 % atkvæðanna en með henni í kjörinu voru Kristrún Sigurjónsdóttir, Valur, (21,76%) og Shannon McCallum, KR, (28,70%).
Í 16. umferð var Hardy með 16 stig, 14 fráköst og 6 stoðsendingar í leik gegn Haukum, 26 í framlag. Í 17. umferð var hún með 29 stig, 18 fráköst og 6 stoðsendingar gegn Grindavík og 46 í framlag og í 18. umferð gerði hún 39 stig, tók 24 fráköst og gaf 8 stoðsendingar gegn Keflavík og hlaut 49 framlagsstig!
Lele Hardy er fyrsti leikmaðurinn þetta tímabilið til að vera valinn Domino´s leikmaðurinn í tvígang.
