Í kvöld hefst fimmtánda umferðin í Iceland Express deild karla með fjórum leikjum og allir hefjast þeir kl. 19:15. Topplið Grindavíkur fer norður í Skagafjörð og mætir þar Tindastólsmönnum.
Leikir kvöldsins:
Valur-Fjölnir
Tindastóll-Grindavík
Snæfell-ÍR
Þór Þorlákshöfn-Njarðvík
Valur-Fjölnir
Valsmenn sem fyrr á botni deildarinnar án stiga og 16 stig í boði svo það er ekki enn hægt að segja að liðið sé fallið en ekkert annað en sigur í öllum mótsleikjum það sem eftir er dugir þeim til að bjarga sér frá 1. deild. Fjölnismenn eru í 8. sæti með 12 stig eins og ÍR, Tindastóll og Njarðvík en öll þessi lið verða að hafa varann á því þau geta ekki burstað af sér þá staðreynd að fall sé mögulegt.
Tindastóll-Grindavík
Stólarnir ættu að vera hátt uppi um þessar mundir eftir að hafa tryggt sig inn í bikarúrslit en liðið er í 9. sæti deildarinnar með 12 stig en Grindavík á toppnum með 26 stig. Grindavík slapp með skrekkinn gegn ÍR í síðustu umferð þegar þeir unnu með flautukörfu en Tindastólsmönnum var pakkað saman í Grafarvogi.
Snæfell-ÍR
Snæfell hefur smokrað sér upp í 5. sæti deildarinnar með 16 stig og hafa unnið fimm deildarleiki í röð. ÍR hefur einnig tapað síðustu tveimur deildarleikjum sínum og berjast nú hart um sæti í úrslitakeppninni.
Þór Þorlákshöfn-Njarðvík
Njarðvíkingar eiga harma að hefna gegn nýliðunum sem unnu stórt þegar liðin mættust í Ljónagryfjunni. Þór hefur 16 stig í 6. sæti deildarinnar en Njarðvíkingar eru með 12 stig í 10. sæti deildarinnar.
Allir á völlinn!
Staðan í deildinni
| Nr. | Lið | U/T | Stig |
|---|---|---|---|
| 1. | Grindavík | 13/1 | 26 |
| 2. | Stjarnan | 10/4 | 20 |
| 3. | Keflavík | 10/4 | 20 |
| 4. | KR | 9/5 | 18 |
| 5. | Snæfell | 8/6 | 16 |
| 6. | Þór Þorlákshöfn | 8/6 | 16 |
| 7. | ÍR | 6/8 | 12 |
| 8. | Fjölnir | 6/8 | 12 |
| 9. | Tindastóll | 6/8 | 12 |
| 10. | Njarðvík | 6/8 | 12 |
| 11. | Haukar | 2/12 | 4 |
| 12. | Valur | 0/14 | 0 |
