Í kvöld lýkur 17. umferð í Domino´s deild karla en þá eru tveir leikir á dagskránni. Þór Þorlákshöfn tekur á móti KFÍ í Icelandic Glacial Höllinni og Keflavík fær Tindastól í heimsókn í Toyota-höllina. Vitaskuld báðir leikir kl. 19:15 en viðureign Keflavíkur og Tindastóls verður í beinni netútsendingu á Sport TV.
Leikir kvöldsins, Domino´s deild karla
Þór Þorlákshöfn-KFÍ
Í kvöld eru þessi lið aðeins að mætast í annað sinn í deildarkeppni úrvalsdeildar í Þorlákshöfn. Fyrsti deildarslagur þessara liða í Þorlákshöfn fór fram í október 2003 en þá hafði KFÍ 102-115 útisigur. Mikið vatn hefur runnið til sjávar síðan þá og Þór vermir nú 3. sæti deildarinnar en KFÍ 9. sætið, 12 stig skilja liðin að og KFÍ berst hart fyrir tilverurétti sínum í deildinni og sæti í úrslitakeppninni um leið en Þórsarar eru í bullandi baráttu um heimaleikjarétt í úrslitakeppninni og þá er deildarmeistaratitillinn þeim ekki enn úr greipum genginn ef litið er til þeirra stiga sem enn eru í pottinum.
Keflavík-Tindastóll
Keflavík og Tindastóll eru nú ekki að mætast í sínum fyrsta deildarleik úrvalsdeildar í Keflavíkinni. Sá leikur fór reyndar fram árið 1988 þar sem Keflavík hafði 97-67 sigur en það er önnur saga. Síðast þegar Tindastóll vann leik í deild í Keflavík var árið 2000! Í dag eru Stólarnir nýkomnir af botni deildarinnar með 10 stig í 10. sæti en Keflavík er heitasta lið deildarinnar um þessar mundir með sex sigurleiki í röð og vermir 4. sæti deildarinnar með 22 stig.
Leikir kvöldsins, 1. deild karla
19:15 Hamar – Breiðablik
19:15 Reynir Sandgerði – Höttur
20:00 Valur – Haukar
