Fimm leikir fara fram í Domino´s deild karla í kvöld og hefjast þeir allir kl. 19:15. Sætaskipan getur orðið á stöðutöflunni eftir kvöldið og ef við lítum til toppliðanna KR og Keflavíkur bæði með 26 stig þá munu þau vísast kappkosta við að gera sem fæst feilspor í baráttunni um deildarmeistaratitilinn.
Leikir kvöldsins í Domino´s deild karla, 19:15:
Njarðvík – Þór Þorlákshöfn
Stjarnan – KR
Snæfell – Haukar
ÍR – Grindavík
Keflavík – Valur
Njarðvík – Þór Þorlákshöfn
Fyrri leikur liðanna var einn af betri leikjum deildarkeppninnar þetta tímabilið. Tvíframlengja þurfti í Icelandic Glacial Höllinni þar sem Njarðvíkingar mörðu að lokum sigur. Þórsarar þurfa sex stiga sigur í Ljónagryfjunni í kvöld til að komast upp fyrir Njarðvík, taka innbyrðisviðureignina og planta sér í 4. sæti deildarinnar. Þórsarar hafa kunnað vel við sig í Ljónagryfjunni síðustu tvö tímabil undir stjórn Benedikts Guðmundssonar og unnu leikinn í Ljónagryfjunni 83-84 á síðustu leiktíð og 75-90 á þarsíðustu leiktíð.
Stjarnan – KR
Eitt mesta baslið sem KR lenti í fyrir jól í deildarkeppninni var heimaleikurinn gegn Stjörnunni. KR marði þann leik 88-84 en síðan þá hafa Björn Steinar Brynjólfsson og Jón Sverrisson reimað á sig Stjörnuskó en Kjartan Atli Kjartansson hefur látið af störfum svo það er nokkuð breytt Stjörnulið frá fyrri leiknum sem tekur á móti KR í kvöld. Staðreynd dagsins er hinsvegar sú að KR hefur aldrei í sögunni tapað deildarleik í Ásgarði, KR hefur aðeins einu sinni tapað fyrir Stjörnunni í Ásgarði og það var í úrslitakeppninni 2011, 107-105.
Snæfell – Haukar
Er 12 ára bið Hauka á enda? Síðasti sigur Hauka í Stykkishólmi í Íslandsmótinu kom árið 2002. Haukar unnu reyndar fyrri leik liðanna á tímabilinu í Hafnarfirði 82-77 og stigin tvö sem verða í boði í kvöld skipta liðin gríðarlegu máli enda Snæfell í 8. sæti með 10 stig og Haukar í 7. sæti með 14 stig.
ÍR – Grindavík
Röstin gerði lítið fyrir ÍR fyrir jól, piltarnir hans Örvars lágu þar 98-73 en nú er komið að því að sinna hlutverki gestgjafans þegar Íslandsmeistarar síðustu tveggja ára mæta á heimavöll þess liðs sem unnið hefur flesta Íslandsmeistaratitla í efstu deild karla. Bæði lið hafa byrjað vel á nýja árinu og ÍR hefur híft sig smávegis frá botninum og eygir von um sæti í úrslitakeppninni en Grindvíkingar ef allt gengur upp í þeirra áformum geta enn blandað sér í baráttuna um deildarmeistaratitilinn. Menn selja sig dýrt í Hertz-Hellinum í kvöld.
Keflavík – Valur
Heilum 24 stigum munar á þessum tveimur liðum í deildinni og Keflvíkingar eru líklega vel pumpaðir og æðaberir eftir stórsigur á grönnum sínum í Njarðvík í síðustu umferð. Valsmenn hafa tvö stig undir beltinu og 16 stig í boði það sem eftir lifir deildarkeppninnar til að forða sér frá falldraugnum. Nestið sem Hlíðarendapiltar fara með á Reykjanesbrautina í kvöld er 92-81 sigur Vals á Keflavík í marsmánuði árið 1992.
Staðan í deildinni
Nr. | Lið | U/T | Stig |
---|---|---|---|
1. | KR | 13/1 | 26 |
2. | Keflavík | 13/1 | 26 |
3. | Grindavík | 10/4 | 20 |
4. | Njarðvík | 9/5 | 18 |
5. | Þór Þ. | 8/6 | 16 |
6. | Stjarnan | 7/7 | 14 |
7. | Haukar | 7/7 | 14 |
8. | Snæfell | 5/9 | 10 |
9. | ÍR | 4/10 | 8 |
10. | Skallagrímur | 4/10 | 8 |
11. | KFÍ | 3/11 | 6 |
12. | Valur | 1/13 | 2 |
Mynd/ Sagan er Brynjari Þór og KR-ingum hliðholl í Ásgarði.