Það vakti mikla athygli og kátínu á síðasta Pollamóti Þórs í körfuknattleik þegar einn allra besti leikmaðurinn í sögu íslenska boltans, Damon Johnson, mætti óvænt til leiks. Damon, sem fagnaði fimmtugsafmæli sínu fyrir tveimur árum, klæddist treyju Kefboys í flokki karla 40 ára og eldri. Í ljós kom að gamlir töfrar hverfa ekki svo glatt, því spilamennska hans átti stóran þátt í því að liðið stóð uppi sem sigurvegari í sínum flokki.
Damon á að baki glæsilegan feril á Íslandi en hann varð þrisvar sinnum Íslandsmeistari og tvisvar bikarmeistari á gullaldarárum sínum með Keflavík. Gummi Odds náði tali af kappanum á mótinu og spurði hvað hefði dregið hann norður. Damon sagðist enn vera í miklu og góðu sambandi við gömlu liðsfélagana og þegar hann frétti af mótinu hafi hann einfaldlega sagt strákunum að hann yrði að vera með.
Þetta var sérstök stund fyrir Damon, enda hafði hann ekki spilað körfubolta síðan hann tók skóna síðast úr hillunni með Keflavík tímabilið 2014–2015. Hann lagði áherslu á að Keflavík hefði verið hans fyrsta atvinnumannalið og því hefði það mikla þýðingu fyrir sig að koma aftur til landsins. Hann viðurkenndi að árin væru farin að segja til sín á vellinum en sagðist ekki hlaupa eins hratt eða hoppa eins hátt og áður, en körfuboltagáfan væri hins vegar enn fyllilega til staðar. Þátttakan mæltist svo vel fyrir að félagarnir voru þegar farnir að ræða það að gera þetta að árlegri hefð.
Damon notaði tækifærið og hvatti alla þá sem hefðu áhuga á körfubolta til þess að draga fram skóna og skrá sig til leiks á næsta mót, en það hefur verið tímasett helgina 2. til 3. október. Keppt verður í þremur flokkum: körlum 25 til 39 ára, körlum 40 ára og eldri, og loks í kvennaflokki 20 ára og eldri. Spilað verður seinnipart föstudagsins og allan laugardaginn, en mótinu lýkur svo með veglegri matarveislu og lokahófi í Sjallanum á laugardagskvöldinu. Opnað hefur verið fyrir skráningu með tölvupósti á [email protected] og gildir reglan fyrstir koma, fyrstir fá.
