Jón Arnór Stefánsson var í liði CB Granada í dag en kappinn hefur verið fjarverandi sökum meiðsla síðan síðla desembermánaðar. Á meðan hefur allt gengið á afturfótunum hjá Granada og liðið mátti í dag sætta sig við enn einn ósigurinn. Zaragoza kom í heimsókn til Granada og hafði 66-75 sigur á heimamönnum.
Jón var ekki í byrjunarliðinu í dag en skoraði 3 stig í leiknum á 22 mínútum. Hann var einnig með 2 fráköst og 2 stoðsendingar. Sem fyrr er Granada á botni ACB deildarinnar á Spáni með 3 sigra og nú 17 tapleiki.
Bandaríkjamaðurinn Coby Karl, sonur þjálfarans fræga George Karl, var stigahæstur hjá Granada í dag með 21 stig, næstur var A.C. Lima með 16 stig.
Barcelona og Real Madrid eru á toppi deildarinnar með 17 sigra og 3 tapleiki.
