Íslenska liðið átti í raun aldrei möguleika gegn heimsklassa liði Serba sem sýndi mátt sinn með því að nýta alla þá leikmenn sem þeir höfðu úr að moða. Allir leikmenn liðsins skoruðu í leiknum og 7 þeirra skoruðu 10 stig eða meira. Þar fór fyrrum NBA leikmaðurinn og núverandi miðherji CSKA Moscow Nenad Krstic fyrir sínum mönnum með 15 stig og 6 fráköst.
Í Íslenska liðinu skilaði Hlynur Bæringsson alveg stórmerkilegum tölum gegn ótrúlega sterku liði Serba. Hlynur skoraði 12 stig, hirti 9 fráköst og gaf 4 stoðsendingar en hann var frákastahæsti maður vallarins(þess má þó geta að enginn í serbneska liðinu spilaði jafn margar mínútur og Hlynur eða 26 talsins). Jakob Sigurðsson fann sig ágætlega fyrir utan þriggja stiga línuna og setti þar niður 4 af 7 skottilraunum en hann skoraði 14 stig í leiknum og var stigahæstur Íslenska liðsins.
Næsta verkefni Íslands er í Laugardalshöllinni á sunnudaginn næstkomandi þegar Slóvakía kemur í heimsókn en útileikur Íslands gegn Slóvakíu er eini sigurleikur Íslands í undankeppninni hingað til. Spurningin er, verður Íslenska liðið búið að jafna sig eftir þessa erfiður ferð til Serbíu?
mynd: [email protected]
