Körfubolta er oft lýst sem “íþrótt áhlaupa” og sigur Íslands gegn Eistlandi var fullkomið dæmi um það. Ísland skoraði 19 stig gegn 2 á flottum kafla, en Eistland átti frábæran fjórða leikhluta sem þeir unnu 19-31. Ísland vann þó að lokum 83-77.
Óskar Víkingur Davíðsson spilaði ekki með í þessum leik, né í leik gærdagsins gegn Dönum, sökum tognunar í baki. Að sögn sjúkraþjálfara hafði hann verið tæpur í bakinu fyrir mót og endurvakti meiðslin í fyrsta leik mótsins. Vonin er að hann verði með á morgun gegn Svíþjóð.
Gangur leiks
Góð vörn skilaði sínu í fyrsta leikhluta þar sem Ísland skoraði úr vel úthugsuðum hraðaupphlaupum. Skotnýting liðsins var mjög fín þótt skotvalið hefði mátt vera betra, en liðið hitti úr 50% sinna skota utan af velli, þó aðeins 1/9 þriggja stiga. Íslendingar tóku fljótt stjórnina á leiknum og staðan eftir fyrsta 22-13 fyrir Íslandi.
Íslendingarnir voru greinilega komnir á bragðið í upphafi annars leikhluta og skoruðu 13 stig í röð. Tvö vítaskot frá Eistum bundu síðan enda á 19-2 áhlaup Íslendinga sem hafðist seint í fyrsta fjórðung. Eistarnir skoruðu sína fyrstu körfu þegar sex mínútur voru liðnar. Eistunum tókst loks að minnka muninn í 15 stig, en Íslendingar áttu lokaorðið og staðan í hálfleik 45-28 fyrir Íslandi.
Liðin skiptust á körfum fyrstu mínútur þriðja leikhluta og virtist sem að Eistarnir væru farnir að átta sig aðeins betur á Íslendingunum. Við miðbik leikhlutans komust þeir í 14-12 eftir stóran þrist og tók þá Israel Martin leikhlé. Stór hraðaupphlaupssniðskot frá Tómasi og Hilmi skiluðu sigrinum í leikhlutanum og staðan eftir hann 64-46.
Eistarnir byrjuðu fyrstu 3 mínútur leikhlutans vel og minnkuðu muninn í 7 stig (68-61) eftir 13 stiga áhlaup gegn aðeins 4 frá Íslandi. Munurinn flakkaði úr 7 í 5 nokkrum sinnum þar sem Ísland virtist aðeins vera að missa hausinn. Eistinn Kaspar Kuusmaa minnkaði muninn í 2 stig með löngu þriggja stiga skoti, en Daníel Ágúst setti tvö sniðskot til að koma Íslandi 6 stigum yfir. Annar stór þristur frá Eistum minnkaði muninn í 3 stig með tvær mínútur eftir, en tröllið Almar reif niður sitt eigið sóknarfrákast í næstu sókn og kom muninum í 5 stig. Annar þristur frá Eistum en Daníel hittir úr báðum vítum í næstu sókn og staðan 81-77 með 24 sekúndur eftir af æsispennandi leik. Hilmir setti tvö víti í viðbót og lokasóknin Eistanna með 14 sekúndur eftir. Karl Markus Poom endar með boltann til að taka síðasta skot leiksins, en hann hafði sett tvo stóra þrista í síðustu sóknum liðsins. Tómas Valur hamrar boltanum aftur til Poom og setur sætan svip á enda leiksins. Ísland sigrar Eistland 83-77.
Lokasekúndur leiksins má sjá í myndbandi hér fyrir neðan.
Atkvæðamestir
Almar Orri Atlason átti flottan leik með 17 stig og 7 fráköst. Einnig spilaði Hilmir Arnarson vel og lauk leik með 18 stig og 7 fráköst.
Áberandi tölfræði
Lið Eistlands var með 96% vítaskotnýtingu, en þeir hittu úr öllum nema einu, 22/23.
Hvað er næst?
Liðið keppir gegn Svíþjóð í næstsíðasta leik mótsins á morgun kl 15:15 að Íslenskum tíma.
