Íslenska U16 ára landslið drengja tryggði sér glæsileg silfurverðlaun í B-deild Evrópumótsins í Gevgelija í Makedóníu eftir mikinn háspennuleik gegn Króatíu sem lauk með svekkjandi tveggja stiga tapi, 67-69.
Íslensku strákarnir fengu tækifæri til að tryggja sér sigurinn á lokasekúndunum þegar þeir tóku þriggja stiga skot um leið og leiktíminn rann út, en boltinn vildi ekki ofan í.
Þrátt fyrir tapið er árangur íslenska liðsins á mótinu stórkostlegt afrek. Strákarnir höfðu þegar tryggt sér sæti í efstu deild, A-deild Evrópumótsins að ári, sem er sögulegur áfangi fyrir íslenskan körfuknattleik. Þá sýndi liðið ótrúlegan karakter og miklar framfarir í úrslitaleiknum í kvöld. Liðin mættust í lokaumferð riðlakeppninnar þar sem Króatar unnu öruggan 27 stiga sigur, en í kvöld mætti allt annað íslenskt lið til leiks, barðist um hvern einasta bolta og veitti sterku króatísku liði harða keppni allt fram á síðustu sekúndu.
Leikurinn var í járnum frá upphafi til enda þar sem forystan skipti um hendur 16 sinnum og liðin voru jöfn 12 sinnum. Króatar leiddu 17-12 eftir fyrsta leikhluta en Ísland svaraði frábærlega í öðrum leikhluta með því að skora 26 stig og ná 38-40 forskoti fyrir leikhlé. Í síðari hálfleik hélt mikil spenna áfram að einkenna leikinn þar sem vörnin var í fyrirrúmi hjá báðum liðum.
Atli Freyr Haraldsson Katrínarson var stigahæstur í íslenska hópnum með 18 stig og tók að auki 12 fráköst. Davíð Breki Antonsson skoraði 13 stig og gaf 5 stoðsendingar, Hlynur Ingi Finnsson bætti við 11 stigum og Jón Breki Sigurðarson skilaði 10 stigum ásamt 9 fráköstum. Kormákur Nói Jack og Baltasar Torfi Hlynsson skoruðu báðir 6 stig í leiknum.
Íslenska liðið getur borið höfuðið hátt eftir magnaða frammistöðu á mótinu þar sem liðið vann sex af átta leikjum sínum og sýndi að það á fullt erindi á meðal þeirra allra bestu í Evrópu.
