Njarðvík hefur samið við Isabellu Ósk Sigurðardóttur um að leika með liðinu á yfirstandandi tímabili í Subway deild kvenna. Isabella kemur til liðsins frá uppeldisfélagi sínu Breiðablik, þar sem hún hefur leikið síðustu ár, en hún lék einnig fyrir South Adelaide Panthers í Ástralíu síðastliðið sumar.
Í þeim sjö deildarleikjum sem Isabella Ósk hefur leikið með Breiðablik á tímabilinu hefur hún verið með 12 stig og 13 fráköst að meðaltali í leik og tæpa 22 framlagspunkta að jafnaði sem gerir hana að sjöunda framlagshæsta leikmanni deildarinnar þegar þetta er ritað.
„Koma Isabellu styrkir hópinn okkar gríðarlega enda er hér á ferðinni einn af bestu leikmönnum deildarinnar. Við fögnum því að fá Isabellu í Ljónagryfjuna og erum spennt að sjá hvernig henni gangi að ná utan um þræðina í okkar liði,” sagði Rúnar Ingi Erlingsson þjálfari.
Í samtali við Isabellu við undirskriftina sagði hún að tími hefði verið kominn til að leita á ný mið. „Ég vissulega kveð Blika með söknuði enda mitt uppeldisfélag en held nú inn í toppbaráttuna með Njarðvík. Mér hefur fundist liðið mjög spenanndi í Njarðvík og er spennt að hefja störf með Rúnari, Lárusi og þessum sterka hóp.“
