Grindvíkingar áttu aldrei séns í ÍR-inga í kvöld, ÍR-ingar mættu ákveðnir til leiks og voru klárlega það lið í kvöld sem langaði virkilega í sigur þegar liðin mættust í Hellinum í Breiðholtinu. ÍR-ingar skoruðu fyrstu körfuna en Grindvíkingar komust í 4-2, það var eina skiptið sem Grindvíkingar komust yfir í leiknum og vandræðagangur þeirra í þessum leik var í raun vandræðalega mikill, bæði í sókn og vörn.
ÍR-ingar með Bartolotta í broddi fylkingar unnu fyrsta leikhluta 22-15.
Það var svo í öðrum leikhluta sem ÍR-ingar gjörsamlega sökktu Grindvíkingum og unnu þann leikhluta 34-17, björgunarsveitin í Grindavík var víst kölluð út í hálfleik til að leita að liði Grindvíkinga. Gestirnir voru í miklum vandræðum varnarlega og ÍR-ingar nýttu sér það, fengu galopin þriggjastigaskot trekk í trekk sem þeir nýttu vel.
Bartolotta var komin með 17 stig í liði ÍR í hálfleik en Pettinella 10 stig í liði gestanna.
Í seinni hálfleik gerðist fátt markvert, ÍR-ingar leiddu með 25-35 stigum, gestirnir áttu engin svör við góðu ÍR liði í kvöld.
Heildarskor:
ÍR: Nemanja Sovic 26/7 fráköst, James Bartolotta 22/4 fráköst, Kelly Biedler 16/14 fráköst/8 stoðsendingar/3 varin skot, Hjalti Friðriksson 9, Ásgeir Örn Hlöðversson 7, Sveinbjörn Claesson 6, Davíð Þór Fritzson 2, Eiríkur Önundarson 2, Níels Dungal 2, Daníel Capaul 0, Þorgrímur Emilsson 0.
Grindavík: Kevin Sims 17, Þorleifur Ólafsson 14/4 fráköst, Ryan Pettinella 13/5 fráköst, Helgi Björn Einarsson 11, Páll Axel Vilbergsson 5/6 fráköst, Guðlaugur Eyjólfsson 5, Ármann Vilbergsson 2, Ólafur Ólafsson 2, Egill Birgisson 0, Ómar Örn Sævarsson 0, Björn Steinar Brynjólfsson 0, Þorsteinn Finnbogason 0.
Dómarar: Eggert Þór Aðalsteinsson, Steinar Orri Sigurðsson
Ljósmynd/ Tomasz Kolodziejski: Sovic var stigahæstur í sigurliði ÍR í kvöld.
