Slóvenska körfuknattleikssambandið tilkynnti í gærkvöldi lokahóp Slóveníu fyrir lokamót Eurobasket sem hefst í vikunni. Slóvenía leikur í A-riðli með Grikklandi, Finnlandi, Frakklandi, Póllandi og Íslandi en riðillinn fer fram í Finnlandi.
Lið Slóveníu er mjög sterkt í þetta skiptið. Þeirra helsta stjarna Goran Dragic leikmaður Miami Heat er með en hann hefur gefið það út að hann muni leggja landsliðsskónna á hilluna að Eurobasket loknu. Helsta vonarstjarna Slóveníu og evrópu í dag Luka Doncic leikmaður Real Madrid er einnig í hópnum. Hann er talin vera mjög ofarlega í nýliðavali NBA eftir ár og þykir eitt mesta efni sem kemur frá Evrópu í mörg ár.
Ísland mætir Slóveníu þann 5. september kl 10:30 að íslenskum tíma. Það gæti orðið næst síðasti landsleikur Dragic fyrir Slóveníu ef liðið kemst ekki áfram.