Njarðvíkingar nældu í tvö dýrmæt stig í toppbaráttu Subway-deildarinnar í kvöld með öruggum 103-72 sigri á nýliðum Hamars. Strákarnir úr blómabænum sýndu þó nokkrum sinnum tennurnar en það dugði ekki til.
Heimamenn í Njarðvík mættu kröftugir til leiks og leiddu 33-17 að loknum fyrsta leikhluta. Vörn gestanna úr Hveragerði átti fá svör og gestirnir fóru helst til of illa með boltann gegn sterkri vörn Njarðvíkinga, 11 tapaðir boltar á 10 leikmínútum.
Hamarsmenn fundu fína fjöl í svæðisvörn sinni í upphafi annars leikhluta og byrjuðu annan leikhluta 8-10 á meðan ljónin freistuðust til að taka hvern þristinn á fætur öðrum og fæstir þeirra vildu niður. Þetta form hélt áfram út annan leikhluta en Njarðvíkingar unnu þó þessar tíu mínútur 17-16 og leiddu því 50-33 í hálfleik.
Dwayne Lautier-Ogunleye var stigahæstur Njarðvíkinga í hálfleik með 13 stig en Björn Ásgeir Ásgeirsson var með 12 hjá Hamri.
![](https://www.karfan.is/wp-content/uploads/2024/03/chaz-734x1024.jpg)
Í þriðja fóru þristarnir loks að detta hjá Njarðvíkingum og þá varð inn-út jafnvægið meira í þeirra leik en Hamarsmenn héldu uppteknum hætti með svæðisvörn sína. Daníel Sigmar Kristjánsson fékk reyndar snemma sína fimmtu villu í liði Hamars og þegar leið á þriðja haltraði Ragnar Nathanaelsson af velli eftir samstuð. Njarðvíkingar leiddu að loknum þriðja 80-59 og fátt annað en sigur heimamanna í kortunum.
Til allrar lukku fyrir Hvergerðinga var ekki um neitt alvarlegt að ræða hjá Ragga Nat og var hann mættur aftur á parketið í fjórða leikhluta. Leikurinn rann nokkuð örugglega sitt skeið án nokkurrar ógnunar við sigur heimamanna. Lokatölur í Ljónagryfjunni í kvöld 103-72.
![](https://www.karfan.is/wp-content/uploads/2024/03/Diculescu-1024x683.jpg)
Chaz var stigahæstur Njarðvíkinga í kvöld með 24 stig og Dwayne bætti við 21 stigi og Þorvaldur 19. Hjá Hamri var Björn Ásgeir með 20 stig, Franck Kamagin 19 og Diculescu 18.
![](https://www.karfan.is/wp-content/uploads/2024/03/Screenshot-2024-03-14-at-20.30.54.jpg)
Fróðleiksmoli
Örn Sigurðarson leikmaður Hamars er upprunalega úr Haukum og varð t.d. Íslandsmeistari með Haukum í 7. flokki. Á meðal leikmanna í því liði var handboltalandsliðsmaðurinn Aron Pálmarsson. Aukareitis var Pálmar Sigurðsson faðir Arons þjálfari liðsins og eins og margir gætu munað A-landsliðsmaður Íslands í eina tíð í körfubolta.
![](https://www.karfan.is/wp-content/uploads/2024/03/Screenshot-2024-03-14-at-20.35.25-1024x564.jpg)
Gangur leiksins:
18-8, 33-17
41-27, 50-33
69-50, 80-58
91-68, 103-72