KV liðar mættu í heimsókn á Flúðir í gærkvöldi til þess að etja kappi við heimamenn í Hrunamenn/Laugdælum, og var mikið undir, sæti í 1. deild á næsta tímabili með öllu tilheyrandi. Vel var mætt í íþróttahúsið á Flúðum og létu áhorfendur heyra vel í sér.
Eftir hægar upphafsmínútur þá vöknuðu Hrunamenn aðeins hraðar en Vesturbæingar og höfðu forystu eftir 1. leikhluta 16-11. Heimamenn voru líka sterkari í 2. leikhluta og var staðan eftir hann 41-28. Í síðari hálfleik jókst munurinn jafnt og þétt og lauk leiknum með sanngjörnum 21 stigs sigri heimaliðsins 84-63.
Atkvæðamestir gestanna voru Ásmundur Magnússon með 18 stig og Snorri Sigurðsson og Andri Skúlason settu 12 stig hvor, hjá Hrunamönnum/Laugdælum skoraði Florijan Jovanov 23 stig og Bjarni Bjarnason bætti við 22 stigum.
Við óskum Hrunamönnum/Laugdælum og Sunnlendingum öllum til hamingju með góðann árangur í 2. deildinni í vetur.
Sigurður Orri Kristjánsson
