Vestri og Höttur mættust í dag í fyrri leik sínum af tveimur á helginni í 1. deild karla en liðin mætast aftur á morgun kl 13:00. Höttur byrjaði leikinn mikið betur og komst mest 18 stigum yfir í fyrri hálfleik, 18-36. Heimamenn bitu þó hressilega frá sér og komu sér hægt og bítandi inn í leikinn aftur. Minnst náðu þeir muninum niður í 3 stig, 47-50, áður en leiðir skildu aftur og gestirnir uppskáru þægilegan og öruggan 69-92 sigur.
Vendipunkturinn
Heimamenn virtust vera til alls líklegir þegar innan við fimm mínútur voru eftir af þriðja leikhluta og munurinn einungis 3 stig, 47-50. Allar væntingar um spennandi leik voru þó gerðar að engu því Hattarmenn skoruðu 22 ósvöruð stig í röð á næstu fimm mínútum og var eftirleikurinn bara formsatriði.
Ungur nemur, gamall temur
Gamla kempan Mirkó Stefán Virijevic tók stóru mennina hjá Vestra, sem flestir voru að minnsta kosti áratug yngri, í kennslustund undir körfunni en hann skoraði 28 stig og reif niður 12 fráköst. Mirkó setti niður 10 af 16 skotum sínum og klikkaði ekki úr víti í 8 tilraunum.
Þrennumaskínan
Aaron Moss setti í sína aðra þrennu í röð, og þá þriðju í vetur, með 22 stigum, 12 fráköstum og 11 stoðsendingum.
Í hnotskurn
Hattarmenn eru efstir og ósigraðir í deildinni af ástæðu. Þeir eru vel mannaðir og vel skipulagðir. Vestri, þrátt fyrir að hafa fengið dreifðara stigaskor frá leikmönnum sínum heldur en oft áður, voru bara númeri minni.
Umfjöllun / Sturla Stígsson
Viðtöl:
