Höfrungar og drekar með sigur í Svíþjóð

Þrír leikir fóru fram í sænsku úrvalsdeildinni í gærkvöldi. Norrköping Dolphins höfðu sigur á heimavelli og Sundsvall Dragons nældu sér í útisigur. Pavel og félagar í Norrköping fengu Boras Basket í heimsókn og höfðu þar betur 99-92.

 

Pavel Ermolinski var stigahæstur í liði Norrköping með 19 stig, 10 fráköst og 8 stoðsendingar, rétt við þrennuna og flottur leikur hjá okkar meanni með 4 af 7 í teignum, 3 af 6 í þristum og tvö af þremur vítum vildu niður.

 

Sundsvall Dragons mörðu 10 stiga sigur á nýliðum Stockholm Eagles 83-93 á útivelli. Hlynur Bæringsson átti sterka frammistöðu með Sundsvall, 16 stig, 12 fráköst og 5 stoðsendingar og Jakob Örn Sigurðarson bætti við 6 stigum, 6 fráköstum og tveimur stoðsendingum.

 

Forskotið hjá Sundsvall í sænsku deildinni telur nú sex stig, tróna á toppi deildarinnar með 42 stig en Uppsala situr í 2. sæti með 36 stig. Norrköping er með 30 stig í 4.-6. sæti deildarinnar en hefur þá betur innbyrðis gen Solna og Södertalje sem einnig eru með 30 stig svo það er skammt á milli feigs og ófeigs í Svíþjóð um þessar mundir.