Miskolc komst í kvöld, tímabundið, á topp E-riðils í Eurocup kvenna með öruggum 69-53 sigri á TSV Wasserburg. Helena Sverrisdóttir og Liene Jansone voru stigahæstar í liði Miskolc í kvöld báðar með 14 stig.
Helena kom inn af bekknum og lék í 23 mínútur. Hún setti niður 3 af 6 skotum sínum í teignum en hvorugt þriggja stiga skotið vildi rata rétta leið. Helena tók svo 10 vítaskot og smellti niður 8 þeirra, tók 5 fráköst og gaf 2 stoðsendingar.
Miskolc hefur nú leikið þrjá leiki í Eurocup, unnið tvo en tapað einum en Frakkarnir í Landes sem skelltu Miskolc í fyrsta leik eru þegar þetta er ritað að kjöldraga Lotto Young Cats og því mun Landes hrifsa til sín toppsætið eftir nokkrar mínútur.
