Maryland mátti sætta sig við naumt 71-64 tap gegn Duke í bandarísku háskóladeildinni í nótt. Þessir tveir skólar eru á meðal sterkustu háskólaliða Bandaríkjanna og því gríðarlegur áhugi fyrir leiknum. Haukur Helgi Pálsson fékk 14 mínútur í leiknum en náði ekki að skora.
Jordan Williams liðsfélagi Hauks var stigahæstur hjá Maryland með 23 stig og 13 fráköst en þetta var jafnframt hans níunda tvenna í röð. Haukur tók fjögur skot í leiknum en þau vildu ekki niður, 3 í teig og eitt frá þriggja stiga línunni. Hann var svo með 3 fráköst.
Sigur Duke í nótt var sá tuttugasti og fimmti í röðinni en í þessari grein má sjá brot frá leiknum.
Næsti leikur Maryland er heldur ekki af verri endanum þegar liðið mætir Wake-Forest á útivelli þann 12. janúar næstkomandi. Nú hefur Maryland tapað báðum leikjum sínum í ACC riðlinum og Wake-Forest tapaði sínum fyrsta leik svo það verður slagur þegar liðin mætast á aðfararnótt fimmtudags.
